Oıynnyń birinshi kezeńinde astananyń «Barysy» 2:0 esebimen alǵa shyqqan bolatyn. Matchtyń segizinshi mınýtynda Lınden Veı asyrǵan shaıbany Naıdjel Doýs qaqpaǵa engizdi. Al arada eki mınýt ótkende Maksım Semenov esepti 2:0-ge jetkizdi.
Ekinshi kezeńniń orta tusyna jaqyndaǵanda alań ıeleri esepti teńestirip ketti. 26-shy mınýtta «Salavat Iýlaev» oıynshysy Ioonas Kemppaınen esep aıyrmasyn qysqartsa, arada bir mınýt ótkende qaqpamyzǵa ekinshi gol endi. Gol avtory – Artem Fedorov. Osylaısha, ekinshi kezeń 2:2 nátıjesimen teń aıaqtaldy.
Eki komanda úshinshi 20 mınýttyq kezeńdi alma-kezek shabýylmen bastady. О́ıtkeni, qaı klýb birinshi gol soqsa, jeńis sol komandanyń enshisinde ketetin edi. Mańyzdy upaı úshin baryn salǵan «Salavat Iýlaev» hokkeıshileri qaqpamyz mańynda birneshe qaýipti shabýyl jasap, 50-shi mınýtta óz degenderine jetti. Teemý Hartıkaınen gol soǵyp, komandasyn alǵa shyǵardy. Osy goldan keıin ýfalyqtar ózderin merziminen buryn jeńiske jetetinderine shamadan tys senim artyp, bosańsyp ketti. Qarsylastarynyń erkinsip ketkenin sezgen «Barys» hokkeı klýby sońǵy bir mınýtta qatarynan úsh shaıba soǵyp, «Salavat Iýlaevtan» jeńisti julyp áketti. Alǵashynda Naıdjel Doýs esepti teńestirse, Marten Sen-Per elorda klýbyna jeńis syılady. Al osy oıynda úshinshi golyn soqqan Doýs «Barystyń» jeńisin aıqyndaı tústi. Qorytyndy esep – 5:3.
«Barys» klýbynyń syrt alańdaǵy jeńisi reseılik BAQ-tyń nazarynan tys qalmady. Sports.ru basylymy «Jeńip turǵan matchtyń sońǵy 46 sekýndynda qalaı jeńilýge bolady?», dep taqyryp qoısa, «Chempıonat» saıty «Barystyń» jeńisin fantastıka dep baǵalady.
Qurlyqtyq hokkeı lıgasynda alty oıyn ótkizgen qazaqstandyq komanda Shyǵys aımaǵy boıynsha 13 upaımen úshinshi orynda kele jatyr. Jeti matchtan keıin «Kýnlýn RS» klýby 14 upaımen top bastap tur. «Barystyń» enshisinde tórt jeńis jáne eki jeńilis bar.
Aıta keteıik, «Barys» hokkeı klýby kelesi matchyn erteń syrt alańda Rıgada jergilikti «Dınamo» komandasyna qarsy ótkizedi.
Álı BITО́RE,
«Egemen Qazaqstan»
