Bıyl 10-shy ret uıymdastyrylyp jatqan fýtbol alamanyna 17 jasqa deıingi jasóspirimder quramasy baq synaýda. Jarysqa alys-jaqyn shetelden kelgen segiz qurama qatysyp, týrnır kórigin qyzdyrmaq. Olar tórt-tórtten eki topqa bólingen. «A» tobynda Qazaqstan, Túrikmenstan, Albanııa, Grýzııa quramalary baq synasa, «V» tobynda Qyrǵyzstan, Tájikstan, Reseı, О́zbekstan jasóspirimderi ózara myqtyny anyqtaıdy.
Fýtboldan Qazaqstan Respýblıkasy Prezıdenti kýbogyn jyl saıyn dástúrli túrde uıymdastyrǵannyń arqasynda bul týrnır 2011 jyldan bastap, FIFA men ÝEFA-nyń jasóspirimder fýtbolyn damytý kúntizbesine enip, jasóspirimder quramalarynyń aıqasyna aınaldy. Sol jyldan Qazaqstan jastar quramasynyń nátıjeleri jaqsara bastady. Aıta ketsek, 2011 jyly jastar quramamyz tórtinshi oryn ıelense, kelesi jyly úzdik úshtikke enip, Prezıdenti kýbogynyń qola júldegeri atandy. Al 2013 jyly jastarymyz aıdy aspanǵa bir-aq shyǵaryp, týrnırdiń bas júldesine ıe boldy.
Byltyr Shymkent qalasynda ótken Qazaqstan Respýblıkasy Prezıdenti kýbogynda jastarymyz ekinshi ret chempıon atandy. Fınaldyq kezdesýde Qazaqstan quramasy Tájikstan quramasyn 2:1 esebimen jeńgen bolatyn. Bıyl Reseıde ótken Granatkın týrnıriniń úzdik shabýylshysy atanǵan Erkebulan Seıdahmet dál osy jarysta mergendigimen kózge túsken edi. Tórt kezdesýde úsh gol soǵyp, jarys qorytyndysy boıynsha – eń úzdik shabýylshy atandy. Al komanda kapıtany Dımash Qashken – eń úzdik oıynshy mártebesine ıe bolǵan edi. Bıylǵy týrnırde de otandastarymyz byltyrǵy bıiginen túspeıdi dep senemiz.
Álı BITО́RE,
«Egemen Qazaqstan»
