Aıtpaqshy, ótken aıda Qytaıdyń Taıpeı qalasynda HHIH Búkilálemdik jazǵy ýnıversıada ótken. Osy jarysta bizdiń ziltemirshi Rústem Sybaı ekinshi oryn alǵan edi. Álemdik arenada el namysyn qorǵap júrgen qos ulandy oblys ákimi Qyrymbek Kósherbaev arnaıy qabyldady. Eki jigitke eldiń yqylasyn jetkizgen aımaq basshysy «aldaǵy jarystaryńda kúmisteriń altynǵa aınalsyn» dep tilek bildirdi. Sonymen qatar, qos sportshynyń da bolashaqta altyn alatynyna, el namysyn abyroımen qorǵaıtynyna senetinin aıtty.
– Endi qurmet pen qoshemet, maqtaý men marapat kóbeıedi. Árıne, eldiń yqylasyn shekteý qoıa almaısyń. Biraq soǵan maldanýǵa, boldym-toldym deýge bolmaıdy. Altyn ýaqyttaryńdy zaıa ketirip alasyńdar. Sol sebepti daıyndyqtaryńdy odan saıyn údetip, aldaǵy Olımpıadada top jarýǵa kúsh salyńdar, – dep aǵalyq aqylyn aıtty Qyrymbek Eleýuly.
Jıyn sońynda oblys ákimi Qamshybek Qońqabaevqa avtokóliktiń, Rústem Sybaıǵa 2 mıllıon teńgeniń, al olardyń bapkerlerine 500 myń teńgeniń sertıfıkattaryn tabystady.
– Eńbeksiz jeńis te bolmaıdy. Qos sportshynyń júldesi jastardyń jigerin janyp, jańa bıikterge jeteleıdi. Kóptegen jasóspirimder sportqa qyzyǵatyn bolady. Sizder bizdiń elimizdiń halyqaralyq sporttaǵy mártebesiniń joǵary ekendigin dáleldep, jattyqtyrýshylar men jankúıerlerdiń ǵana emes, barsha qazaqstandyqtardyń úmitin aqtadyńyzdar, – dedi Qyrymbek Eleýuly.
Qos sportshymen sóılestik. Qamshybekten «Medjıdovpen judyryqtasar sátte kóńilińde bir úreı bolǵan joq pa?», – dep suradyq.
– Joq, eshqandaı qorqynysh ta, úreı de bolǵan joq. Qarsylasymnan yǵatyn bolsam, onda nesine bokspen shuǵyldanyp júrmin? Tek el úmitin aqtaı almaı qalamyn ba, altyn júldege qol jetkize alamyn ba, degen ýaıym ǵana boldy. Jalpy, jarysqa tyńǵylyqty daıyndyqpen bardyq. Sonyń arqasynda osyndaı jetistikke jettik, – deıdi ol. Tokıo Olımpıadasynda Qońqabaev 28 jasqa keledi eken. Sony da suradyq. «Asa aýyr salmaqtaǵy sportshylar basqalarǵa qaraǵanda uzaq pisip-jetiledi. Men ózimdi endi pisip, babyma kelip jatyrmyn dep oılaımyn. Buıyrtsa, eki Olımpıadaǵa qatysamyn», – dep jaýap qatty.
Mynadaı qyzyq jaıtty bildik. Álem chempıonatynyń fınalynyń aldynda Qamshybektiń bapkeri Ǵalymjan Baıǵundıevke Qyrymbek Kósherbaev telefon shalypty. «Qamshybek qarsylasynyń qatty soqqysyna tap bolmasyn. Ońǵa-solǵa qashyp, oınap júrip bokstassyn. Bir ornynda turyp qalmasyn», – dep keńes aıtypty. Buryn ózi boksshy bolǵan Qyrymbek Eleýulynyń janashyrlyq sózin Ǵalymjan bapker fınaldyń aldynda Qamshybekke jetkizipti. Solaısha, Qońqabaev elde ózi úshin taqym qysyp otyrǵan mıllıondaǵan adamnyń baryn sezinip, sharshy alańǵa shyǵypty.
Rústem Sybaı Búkilálemdik Ýnıversıadaǵa altyn alý úshin barǵanyn aıtady. «Daıyndyǵym da, babym da kelisip tur edi. Jattyǵý kezinde belimdi aýyrtyp aldym. Sonyń saldarynan bir kıloǵa kem kóterip, altynǵa ilige almaı qaldym. Alda jarys kóp. Basty maqsat – Tokıo Olımpıadasy. Qamshybek ekeýmiz qatar top jaramyz degen senimdemin», – deıdi ziltemirshi.
Jyl basynan beri Qyzylorda oblysynyń sportshylary el birinshilikterinde 563 medal jeńip alsa, Azııa, álem chempıonattarynda 53 medal ıelendi. Elimizdiń ulttyq qurama komandalaryna aımaqtan 420 sportshy engen.
QYZYLORDA
