Oǵan jergilikti quqyq qorǵaý jáne sot organdarynyń, bilim berý, densaýlyq saqtaý jáne mádenıet mekemeleriniń qyzmetkerleri, sondaı-aq azamattyq qoǵam ınstıtýttarynyń jáne jastar uıymdarynyń ókilderi de qatysty. Semınar-trenıngti Qostanaı oblysy ákiminiń orynbasary Marat Júndibaev ashyp, elimizde adam quqyqtaryn qorǵaý halyqaralyq quqyqtyń bólinbes bir bóligi ekenin aıtyp ótti. Elbasy janyndaǵy Adam quqyqtary jónindegi komıssııanyń hatshysy Tastemir Ábishev búgin elimizde adam quqyqtaryn qorǵaý jumystarynyń qalaı júrgizilip otyrǵanyna, sapar maqsatyna toqtaldy.
«Qostanaılyqtarǵa óz quqyqtaryn qalaı qorǵaýdy úıretemiz, eńbek qatynastarynan týyndaıtyn daý-damaıdy sheshý joldary, áıelder men bala quqyqyǵynyń qorǵalýy, adam saýdasyn boldyrmaý sekildi kóptegen máselelerdi kóteretin bolamyz», dedi Tastemir Ábishev.
EQYU-nyń Astanadaǵy Baǵdarlamalar keńsesiniń úılestirýshisi Gúlmıra Qýanjanova, Komıssııa músheleri men sarapshylary T.Ábishev, Z.Baısaqova men S.Jarkenova naqty mysaldarmen tyńdaýshylarǵa adamnyń jáne azamattyń quqyqtary men bostandyqtary týraly ǵana emes, sonymen qatar azamattardyń memleket pen qoǵam aldyndaǵy mindetteri týraly da aıtyp berdi. Shara barysynda tyńdaýshylar BUU adam quqyqtary salasyndaǵy baqylaý fýnksııalarymen, adam quqyqtary jónindegi halyqaralyq konvensııalarǵa qatysty BUU qurǵan baqylaý organdarynyń quzyretimen tanysty, BUU-nyń tıisti Komıtetterinde azamattardyń jeke shaǵymdaryn qaraý tetigin talqylady.
Elbasy janyndaǵy Adam quqyqtary jónindegi komıssııanyń hatshysy Tastemir Ábishev bastaǵan top Qostanaı oblysyndaǵy jumysyn Rýdnyı qalasynan bastady, odan keıin Fedorov aýdanyna barady.
Názıra Járimbet,
«Egemen Qazaqstan»
QOSTANAI
