Pavılon komıssary Paskal Loronyń aıtýynsha, Qazaqstan men Fransııa strategııalyq seriktester bolǵandyqtan, joǵary deńgeıli sharalarda bir-birine qoldaý kórsetý naǵyz dostyqtyń kórinisi.
«Halyqaralyq kórme Qazaqstanmen etene tanysýǵa úlken múmkindik syılady. Sizdiń elińizben, azamattaryńyzben tanysqanyma óte qýanyshtymyn. Bizdiń tehnologııalyrymyzǵa qyzyǵýshylyq bildirgen ár kórermenge aıtar alǵysym sheksiz. Biz mádenı sharalar arqyly Monmartr qalasynyń bólshegin syıǵa tartqymyz keldi. Meniń komıssar retindegi negizgi mindetim eki el arasyndaǵy baılanystyń odan ári nyǵaıýyna yqpal etý. О́z jumysymdy úsh aı ishinde tolyqqandy oryndaýǵa bar kúshimdi jumsadym. Uıymdastyrýshylar tarapynan Qazaqstanǵa alǵysymdy bildirip, Kórmeniń sátti ótýimen quttyqtaǵym keledi», dedi komıssar Loro.
Sonymen qatar, pavılon komıssary bul Kórme álem ǵalymdary men kásipkerleriniń bir jerde bas qosyp, energııa týraly ózekti máselelerdi talqylaýyna mańyzdy alań bolǵanyn erekshe atap ótti.
«1889 jyly Parıjde ótken EKSPO kórmesinde Eıfel munarasy tanystyrylǵan bolatyn. Sol kezde jurtshylyq bul jańalyqty qushaq jaıa qabyldady dep aıta almaımyn. Alaıda, ýaqyt óte kele bul munara Fransııanyń sımvolyna aınaldy. Bolashaqta «Nur Álem» pavılony da EKSPO-2017 kórmesiniń ǵana emes, tutas Qazaqstannyń betke ustar ǵımaratyna aınalatyny nyq senemin», dep Loro myrza sózin támamdady.
Al Fransııa pavılonynyń kommýnıkasııalar dırektory Malgajata Týar kórmeniń ótkizilý deńgeıine joǵary baǵa berip, sharanyń jemisti aıaqtalýymen quttyqtady.
«EKSPO sekildi sharanyń ótkenine óte qýanyshtymyn. Úsh aı ishinde qyzyqty sharalar ótkizip, elimizdi tanystyrdyq. О́tken aptada Astana qalasynyń «Oqýshylar saraıynan» usynys kelip tústi. Olar pavılonda ornalasqan keıbir ınstallıasııalardy óz ǵımarattaryna ornalastyrǵysy keledi eken. Bul ınnovasııalarymyzdyń jurtqa paıdasynyń aıǵaǵy. Kórmeniń maqsaty da sol emes pe, elder arasynda tájirıbe almasý», dedi Malgajata Týar.
Fransııa pavılonyn 3 aı ishinde 600 myńǵa jýyq kelýshiler tamashalaǵan. Sonymen qatar, pavılon Exhibitor Magazine halyqaralyq jýrnalynyń «Redaksııa tańdaýy» marapatyna ıe boldy.
Osy jetistiktermen shektelmeı, Fransııa pavılony 6 qyrkúıekte resmı qabyldaý uıymdastyryp, 2025 jylǵy dúnıejúzilik kórmeni ótkizýge Fransııa kandıdatýrasyn usyndy.
Aıgúl ShERNIIаZ,
«Egemen Qazaqstan»
