«Bıyl kompanııanyń irge qalaǵanyna jıyrma jyl toldy. Búginde «Qazaqstan temir joly» AQ barlyq kóliktiń ınfraqurylymy men qyzmet túrlerin shoǵyrlandyrǵan ulttyq kólik operatory deńgeıine kóterilgen», degen vıse-prezıdent saladaǵy jáne jolaýshylar tasymalyndaǵy serpindi jańǵyrýlar týraly baıandady. Onyń aıtýynsha, «Nurly jol» memlekettik baǵdarlamasy biregeı tártippen jáne el óńirlerin yqpaldastyrý arqyly júzege asýda. Kompanııada júrdek jolaýshylar poıyzy qozǵalysyn damytý baǵdarlamasy jasalyp, irgeli ister qolǵa alynýda.
«Qazirgi tańda Qazaqstannyń barlyq iri qalalary otandyq óndiristen shyqqan «Tulpar-Talgo» jolaýshylar vagondarynan jasaqtalǵan 15 júrdek jolaýshylar poıyzy baǵdary jelisimen qamtylǵan. Ol arqyly poıyzdardyń jol júrý merzimi 1,5-2 esege deıin qysqardy. Byltyrdan beri «Tulpar-Talgo» óndirisinde jańa da jaıly, keń qorapty vagondar qurastyrylýda. 2022 jylǵa deıin 21 jyljymaly quramdy almastyrý josparda bar», dedi A.Sultanov. Onyń sózine qaraǵanda, «Sıfrly temir jol» jobasy aıasynda jolaýshylar tasymaldaý qyzmetin sıfrly júıege kóshirý boıynsha aýqymdy sharýalar atqarylýda.
Búginde ulttyq tasymaldaýshy kompanııa 120 baǵdarǵa qyzmet kórsetip, jylyna 20 mıllıonnan astam jolaýshy tasymaldaıdy. Bıylǵy jarty jylda 10 mıllıondaı adam «Qazaqstan temir jolynyń» qyzmetine júgingen. Bul kórsetkish ótken jyldyń sáıkes merzimimen salystyrǵanda eki paıyzǵa joǵary kórinedi. «Tulpar-Talgo» poıyzdarymen 1 mıllıon 200 myń jolaýshy júripti. Al bul – byltyrǵy esepti merzimniń nátıjesinen 30 paıyzǵa kóp.
Shara barysynda TMD Temir jol kóligi keńesi dıreksııasynyń tóraǵasy P.Kýcherenkonyń, «Jolaýshylar tasymaly» AQ prezıdenti N.Qılybaıdyń, «Reseı temir joly» AAQ jolaýshylar tasymaldaý jónindegi dırektory D.Pegovtyń, Federaldyq jolaýshylar tasymaldaý kompanııasynyń bas dırektory P.Ivanovtyń, Belarýs temir joly jolaýshylarǵa qyzmet kórsetý basqarmasynyń bastyǵy A.Zaharevıchtiń jáne «Lıtva temir joldary» AQ dırektorynyń orynbasary E.Lazeýskastyń baıandamalary tyńdaldy. Qatysýshylar elaralyq baǵdardaǵy jolaýshylar tasymalyn ári qaraı damytýdaǵy qyzmet sapasy men tıimdiligin jetildirý, vagondardyń jaılylyǵyn jaqsartý, salaǵa jańa tehnologııany engizý, naryqty memlekettik retteý barysy tóńiregindegi máselelerdi talqylady.
Ashat RAIQUL,
«Egemen Qazaqstan»
