«Qazsport» telearnasynan tikeleı efırde kórsetkenindeı, bul kezdesýde Evgenıı Koreshkovtyń shákirtteri aıdyn ıelerinen barlyq sátterde sheberlikteriniń basym ekendigin tanyta bildi. Aldymen 6-mınýtta kanadalyq Lınden Veı men Kevın Dallmenniń kómegimen komanda kapıtany Naıdjel Doýs esep ashty. Sodan keıin 14-mınýtta taǵy da L.Veıdiń pasynan keıin shabýylǵa qosylǵan qorǵaýshy, kanadalyq Darren Dıs mergendik tanytty.
Oıynnyń ekinshi kezeńinde astanalyqtar qarqyndy tipti kúsheıtti. Áýeli Martın Sen-Per men Nıkıta Mıhaılıstiń pasyn paıdalanǵan Konstantın Pýshkarev qaqpa sańylaýyn dál kózdedi. 30-mınýtta san basymdylyǵy kezinde Roman Savchenko esepti 4:0-ge jetkizdi.
Budan keıin «Dınamo» qaqpashysyn aýystyrýǵa májbúr boldy. Biraq Djastın Peterstiń ornyna shyqqan Iаnıs Kalnınsh ta óz qaqpasyn aman saqtap qala almady. 32-mınýtta taǵy bir kanadalyq Mettıý Frettın men L.Veıdiń pasynan keıin N.Doýs osy matchtaǵy ekinshi golyn soqty. Sóıtip komanda kapıtany bıylǵy chempıonattaǵy gol sanyn 10-ǵa jetkizdi. Al 39-mınýtta osy oıynda-aq úsh márte nátıjeli pas bergen L.Veıdiń ózi jańa maýsymdaǵy alǵashqy shaıbasyn saldy.
Úshinshi kezeń qarsylastardyń alma-kezek shabýylymen ótti. Urymtal sátterdiń birinde Nursultan Belgibaevtyń qaýipti soqqysyn Iа.Kalnınsh óz qaqpasyna darytqan joq. Aqyry esep ózgermeı, kezdesý 6:0 esebimen astanalyqtardyń paıdasyna aıaqtaldy.
Match barysynda «Barystyń» oıynshylary barynsha tártip buzbaı, jınaqy oınady, oǵan qosa shvesııalyq qaqpashy Henrık Karllson da óz sheberligin kórsete bildi.
Osy kezdesýden keıin 16 upaı jınaǵan astanalyqtar Shyǵys konferensııasynda kósh bastasa, QHL-dyń jalpy kestesinde úshinshi orynda keledi. «Barys» kelesi oıynyn 10 qyrkúıek kúni Podolskide «Vıtıaz» komandasymen ótkizedi. Sodan keıin elordalyqtar óz aıdynyna oralady.
