«Meniń shaqyrýymdy qabyldap, resmı sapar jasap otyrsyz. Qansha kezdessek te, kóp bolmaıdy. Qazirgi ýaqyttyń ózi óte qıyndap tur. Kóp kezdesip, kóp aqyldasý kerek. 25-26 jylda Qazaqstan men Túrkııa arasynda tek qana aǵaıyndyq qarym-qatynastan basqa másele bolǵan joq. Sizdiń sońǵy saparyńyzda biz ekonomıkalyq qarym-qatynas jóninde biraz máselege kelistik. Jasalyp jatqan jumystar kóp. Talaı jumys iske asyryldy, júzege asyp jatqany da bar. Bizdiń óńirde ózimizdiń problema bar, sizderde de bar. Sonyń barlyǵy jaıly aqyldasýǵa, pikir alysýǵa búgin múmkindik túsip otyr», - dedi Nursultan Nazarbaev.
Elbasy erteń elordaǵa 57 ıslam memleketiniń delegasııa basshylary men dúnıejúzilik organdar, barlyǵy 70-ten astam delegasııa keletinin aıtty. Nazarbaev Erdoǵanǵa sondaı jıynǵa qatysatynyna alǵys aıtty.
«Siz ben Pýtınniń suraýymen Sırııa máselesi boıynsha jumystar júrip jatyr. 14-de (qyrkúıek-agenttik eskertpesi) taǵy bir kezdesý óteıin dep tur», - dedi Memleket basshysy.
Al Erdoǵan óz kezeginde Nazarbaevqa shaqyrý úshin rızashylyǵyn bildirdi.
«Qarym-qatynasymyzdyń 25 jyldyǵynda jáne Qazaqstan táýelsizdiginiń 25 jyldyǵynda Astanada bolǵanyma qatty qýanyshtymyn. Men Qazaqstandy alǵash ret Almaty qalasy arqyly tanyǵan edim. Al endi jap-jańa qala Astana bar. Bul jer biz úshin ekinshi úıimiz sanalady. Biz ózimizdi óz úıimizde júrgendeı sezinemiz. Ekonomıka, mádenıet, saıasat, áskerı jaǵynan barlyq qatynastardy damytýǵa tyrysyp jatyrmyz. Qazir aramyzdaǵy saýda aınalymy 2 mlrd dollar shamasynda. Árıne, bul jetkiliksiz dep oılaımyn. Bizdiń maqsatymyz, buryn keliskendeı, saýda aınalymyn 5 mlrd dollarǵa jetkizý. Sebebi Qazaqstan men Túrkııanyń áleýeti buǵan jetkilikti. Aýmaqtyq problemalardyń sheshilýinde aqsaqalymyzdyń (Nursultan Nazarbaev-agenttik espkertpesi) jeke basynyń talpynystary, bastamalary úshin erekshe alǵysymdy bildiremin. 14-i kúni bolatyn Astana kelissózi óte mańyzdy. Alǵy jumystar aıaqtaldy dep estidim. Endi bul jerde aqtyq bir nátıjege kelý kerek. Qudaı qalasa, osy qadamdardyń jemisin Astanada kóremiz. Osylaısha, Jeneva prosesi de jeńildeıdi dep oılaımyn», - dedi Erdoǵan.
Atap ótsek, uzaq jyldarǵa sozylǵan Sırııadaǵy qatyǵysty sheshý máselesi Astanada talqylanyp jatyr. Elordada bul problemaǵa arnalǵan birqatar mańyzdy kezdesý ótken bolatyn. Kelesi kelissózder 14 qyrkúıekke josparlanyp otyr.
Eske salsaq, keshe jergilikti ýaqytpen saǵat 17:00 kezinde Túrkııa prezıdenti mingen «TUR» ushaǵy halyqaralyq Nazarbaev áýejaıyna kelip qondy. Erdoǵannyń áıeli men uly da elordada júr. Erejep Erdoǵan Astanada Sırııa men Mıanmadaǵy daǵdarysty talqylamaq. Erdoǵan elimizge úsh kúndik saparmen keldi. Ol Elbasy Nursultan Nazarbaevpen kelissózder júrgizip, Astanadaǵy Ǵylym jáne tehnologııa jónindegi ıslam yntymaqtastyǵy uıymy sammıtine qatyspaq.
