«Qazaqstanda túrik kapıtalynyń qatysýymen 1600-den astam kásiporyn jemisti eńbek etip jatyr. Túrik qurylysshylary elimizde 20 mlrd dollar somasyna qurylys júrgizdi. Kelissózderde biz «Jańa sınergııa» birlesken ekonomıkalyq baǵdarlamasy, onyń aıasynda Qazaqstan men Túrkııa ındýstrııaldy aımaqtaryn qurý máselelerin, eki eldiń arasyndaǵy saýda-sattyqty basqa deńgeıge kóterý máselesin talqyladyq. Osy rette «Jańa sınergııanyń» ózekti hattamasy shamamen 900 mln dollar bolatyn 26 ınvestısııalyq jobany qamtıdy. Ekijaqty saýda-ekonomıkalyq áleýetti tolyq paıdalaný úshin memleketter arasynda Túrkııanyń tájirıbesi mol toqyma, azyq-túlik, taý-ken ónerkásibi, qurylys, elektronıka, aýyl sharýashylyǵy, týrızm salalarynda múmkindikterdi qarastyrýǵa kelistik. Naqty tapsyrma berildi. Tıisti memleketaralyq komıssııa bul máseleni pysyqtaıtyn bolady», - dedi Nazarbaev.
Kezdesý aıasynda Qazaqstan men Túrkııa ártúrli salany qamtıtyn birqatar kelisimge qol qoıdy. Atap aıtsaq, eki el arasyndaǵy 2017-2020 jyldarǵa arnalǵan «Jańa sınergııa» birlesken ekonomıkalyq baǵdarlamasy sharalar josparynyń hattamasyna qol qoıyldy. Qujat ınvestısııalar tartý, birlesken ındýstrııaldy aımaqtar qurý men birlesken jobalardy júzege asyrý men t.b. qamtıdy. Sondaı-aq, Úlken Almaty aınalma avtojoly qurylysy boıynsha qujatqa qol qoıyldy.
Atap ótsek, keshe jergilikti ýaqytpen saǵat 17:00 kezinde Túrkııa prezıdenti mingen «TUR» ushaǵy halyqaralyq Nazarbaev áýejaıyna kelip qondy. Erdoǵannyń áıeli men uly da elordada júr. Túrkııa basshysy elimizge úsh kúndik saparmen keldi. Ol Elbasy Nursultan Nazarbaevpen kelissózder júrgizip, Astanadaǵy Ǵylym jáne tehnologııa jónindegi ıslam yntymaqtastyǵy uıymy sammıtine qatyspaq.
