Batys Qazaqstan oblystyq qazaq drama testrynda ótken eske alý keshinde tanymal ónerpazdar – Qazaqstan Respýblıkasynyń eńbek sińirgen qaıratkerleri Nurlan О́nerbaev, Saıat Medeýov, QR eńbek sińirgen ártisi Sulýshash Nurmaǵambetova, ánshi-termeshi Meıramgúl Orashevalar arnaıy keldi. Jerles kompozıtordy eske alý sharasyna Batys Qazaqstan oblystyq fılarmonııasynyń ártisteri – Qazaqstan Respýblıkasy mádenıet qaıratkeri Saǵadat Rahmetjanov, «Eren eńbegi úshin» medaliniń ıegerleri Jaskeleń Ǵaısaǵalıev, Jańylsyn Hasanova, Aıbar Haıyrhanov, Qazaqstan Respýblıkasy mádenıet salasynyń úzdigi Maıra Haıdarovalar da qatysyp, óner kórsetti.
Aqyn Aısulý Qadyrbaevanyń sózine jazylǵan «Baryp qaıt, balam, aýylǵa» áni – Temiráli Baqtygereev shyǵarmashylyǵynyń shyńynda turǵan týyndy. Sazgerdi eske alý keshi de osy ánmen ashyldy. Kórermender kompozıtor týraly arnaıy túsirilgen beınefılmdi tamashalady.
– Temiráli Baqtygereevpen sonaý sekseninshi jyldary qazaq óneriniń qara shańyraǵy M.Áýezov atyndaǵy akademııalyq drama teatrynda qyzmet etip júrip tanystym. Ol kisi sol kezeńde teatrdyń dybys operatory edi. Meniń qoıylymdarda án aıtyp júrgenimdi syrttaı baqylap júredi eken. Ol ýaqytta gıtara aspabyn endi úırenip júrgen kezim. «Nurlan, sen gıtaramen án aıtqyń kele me? Mende bir jaqsy án bar. Tyńdap kór» dep «Saǵynysh» ánin tyńdatty. Sóıtip meniń eń birinshi shyrqaǵan ánim de, birinshi kompozıtorym da Temiráli Baqtygereev boldy. Temiráli Baqtygereevtiń shyǵarmashylyǵy, onyń dosqa, ónerpazǵa degen adaldyǵy, boıyndaǵy adamgershiligi, kishipeıildiligi, qarapaıymdylyǵy men úshin saǵynyshqa aınaldy. Aǵamyz: «Nurlan, bizdiń elge baramyz, úlken konsert qoıamyz» dep týǵan jerin aýzynan tastamaı, únemi aıtyp júrýshi edi. Osy jospary naýqasqa shaldyqqannan keıin armanǵa aınaldy. Kóńilge demeý bolary – aǵamyzdyń úlken keshi kóziniń tirisinde Almatyda ótti. Al onyń kókeıinde ketken bir armanyn búgin biz oryndap turmyz. Aǵamyzdyń týǵan topyraǵyna onyń ánin, shyǵarmalaryn alyp keldik. Endi Temiráli Baqtygereevtiń kindik qany tamǵan týǵan jerimen máńgilik úzilmes baılanysy bastaldy, – dedi Nurlan О́nerbaev tolqyp turyp.
Qazaqstan Respýblıkasynyń eńbek sińirgen qaıratkeri Saıat Medeýov, aqyn Aısulý Qadyrbaeva, kompozıtordyń zaıyby Jámıla apaı sahnada sóz alyp, sazger týraly áserli estelikterimen bólisti. Batys Qazaqstan oblysynyń birinshi orynbasary Arman О́teǵulov kompozıtordyń jaryna, Almaty qalasynda Temiráli Baqtygereevtiń úlken keshin uıymdastyrýǵa uıytqy bolǵan Qazaqstan Respýblıkasynyń eńbek sińirgen ártisi Sulýshash Nurmaǵambetovaǵa qurmet kórsetip, syı-sııapat jasady.
– Jerlesimiz Temiráli Baqtygereevtiń «Baryp qaıt, balam, aýylǵa» áni týǵan jerinen jyraqta júrgen barsha qazaqtyń júreginen oryn alǵan áserli týyndy boldy. Aǵamyz budan ózge de kóptegen myqty týyndylardy dúnıege ákeldi. Temiráli aǵamyzdyń shyǵarmashylyq keshteri óziniń kindik qany tamǵan Qaztalov aýdany Qaıyńdy aýylynda da jalǵasyn tabar dep oılaımyn, – dedi Arman Kárimuly.
Qazbek QUTTYMURATULY,
«Egemen Qazaqstan»
Sýretti túsirgen Rafhat HALELOV
