О́ńir basshysy petropavldyq «Qulager» komandasyn maýsym aldyndaǵy Qazaqstan Kýbogi hokkeı týrnırindegi jeńisimen quttyqtady.
«Bizdiń komanda jeńimpazǵa tán erik-jiger tanytty. Bul árbir oıynshynyń, bapkerler shtabynyń, klýb basshylyǵynyń eńbegi. Komanda men jankúıerlerge jańa maýsymda jańasha kóńil kúı men iri jeńister tileımin!» - dedi Qumar Aqsaqalov.
«Qulager» komandasynyń kapıtany Ilgız Nurıev te jankúıerlerge alǵys sóz sóıledi. Ol: «Jankúıerlerdiń qoldaýy bolmaǵanda, bul jeńiske jetpes edik», - dedi.
Hokkeı maýsymy «Qulager» jáne «Gornıak» (Rýdnyı) komandalary arasyndaǵy matchpen bastaldy. Birinshi taımnyń aıaqtalýyna bir jarym mınýt qalǵanda Dáýlet Kenbaev («Gornıak») esepti ashty. Úziliske toǵyz sekýnd qalǵanda «Qulager» esepti teńestirdi. Dmıtrıı Ismagılov jaqyn qashyqtyqtan shaıbany qaqpaǵa dál baǵyttady. Birinshi kúngi nátıje jergilikti komandanyń 3:1 esebindegi jeńisimen aıaqtaldy. Osy komandalar arasyndaǵy ekinshi match jeksenbide ótedi.
