Hans Kısman jáne Martın Post, Gollandııadan kelgen saıahatshylar:
– Birinshi kezekte «Nur Álem» pavılonyna jol tarttyq. Tańerteń 9.00-de kirgennen, túske taman bir-aq shyqtyq. «Jasyl» energııanyń ınnovasııalaryna toly segiz qabat bizdi tań qaldyrdy. Ásirese, sý energııasyn qoldanýdyń jańa tásilderi týraly bildik. Gollandııada kólder men ózender kóp bolǵandyqtan, bul jańalyq biz úshin asa mańyzdy. Bizder ázirge Monako, Germanııa jáne Ispanııa elderiniń pavılondaryn aralap úlgerdik. Birneshe kún ýaqytymyz bar, barlyǵyn túgesip úlgeremiz degen oıdamyz.
Qazaq elordasyna kelsek, shahar jańashyldyǵymen unady. Záýlim ǵımarattardyń barlyǵy-derlik zaman talabyna saı jasaqtalǵan. Iаǵnı, sáýlettik kelbeti, sándik ajary birden baýrap alady. Buryn-sońdy munda tabanymyz tımegen edi. Endi kórgenimizge qýanyp júrmiz.
Pavel Stanko, Chehııadan kelgen saıahatshy:
– Astanaǵa búgin ǵana issaparmen keldim. Dostarym – EKSPO kórmesindegi Chehııa pavılonynyń uıymdastyrýshylary. Keremet múmkindikti paıdalanyp, halyqaralyq sharany óz kózimmen tamashalaıyn dep sheshtim. Alǵashqylardyń qatarynda Qazaqstan pavılonyn kórgim keledi. Sebebi, tanystarym pavılondy tanymdyq jaǵynan usynary kóp dep aıtty.
Shynymdy aıtsam, kórme qurylysynyń salyný qarqynyna tań qaldym. Tym az ýaqyt aralyǵynda úlken terrıtorııa ishinde záýlim ǵımarattar turǵyzý – ońaı is emes. Muny qazaqstandyqtardyń uıymshyldyǵy, birligi, dostyǵy arqasynda dep bilemin. Astana óte unap jatyr.
Dana Meıirbekova, Almaty qalasynan kelgen saıahatshy:
– Almatydan ulym ekeýmiz EKSPO-2017 halyqaralyq kórmesin tamashalaýǵa ádeıi keldik. Búkil pavılondar tabıǵat kúshin qalaı qoldaný kerek ekenin tolyqtaı kórsetedi. Energııany tıimdi qoldaný máselesi búkil álem úshin ózekti. EKSPO arqyly Qazaqstan eli tanylyp jatyr.
Kórme barysynda keremet konsertter men sharalardyń ótip jatqanyna qýanyshtymyn. «Dıý Soleı sırki» men La Skala teatrynyń óner kórsetýi kórme qonaqtary úshin úlken syılyq dep oılaımyn. Osy sharalardyń biz de qonaǵy bolǵymyz keledi. Baqytymyzǵa oraı, bıletterin alyp úlgerdik.
Osyndaı sharanyń bitip jatqany kóńilge az-kem muń uıalatady. Bitpese eken tileımiz. Amal neshik, ár nárseniń aıaǵy bar. Bolashaqta Qazaqstanda taǵy da EKSPO ótse eken degen tilekshilerdiń qatarynanbyz.
Marııa Rozalı, Malaızııadan kelgen saıahatshy:
– Men Astanaǵa Malaızııa eliniń forýmyna qatysýǵa keldim. Halyqaralyq kórmeniń ótip jatqanyn estip, bir kúnimdi arnaıy bólip, qalashyqty aralap júrmin. Eń birinshi baıqaǵanym – eriktiler óte meıirimdi jáne aǵylshyn tilin jetik meńgergen. Meniń búkil suraqtaryma jaýap berip, barynsha kómek kórsetýge tyrysty.
Kórmeden jasyl energııa týraly bilimimdi jetildirdim. Bolashaqta bul qýat kózderi álemdi saqtap qalady dep oılaımyn. Ǵalamdyq jylyný kezinde osyndaı balamaly energııa kózderin jetildirý adamzattyń basty maqsaty bolý kerek. Sol sebepti, Qazaqstannyń úlken iske qosyp jatqan úlesi eleýli. Meniń bir armanym bar, ol – qazaq ulttyq taǵamynan dám tatý. Munyń reti kelmeı jatyr ázir. Buıyrtsa, qonaqjaı halyqtyń qazy-qarta, jal-jaıasynyń til úıirgenin sezingim keledi.
Iman Al-Marzýkı, Birikken Arab Ámirlikterinen kelgen erikti:
– Kórmede bir aı kóleminde qyzmet etýdemin. Astanaǵa kelgenime óte qýanyshtymyn. Qalanyń ǵımarattary ádemi, al adamdary meıirimdi. Jaqynda Býrabaıǵa baryp keldim. Tabıǵaty keremet jer eken. Jalpy, Arab Ámirlikteri men Qazaqstannyń tabıǵatynda uqsastyqtar bar ekenin bilemin. Munda da shóldi aımaqtar bar. Sondyqtan osyndaı óńirlerde energııany tıimdi qoldaný máselesi eki elge birdeı mańyzdy. Sol jóninde tájirıbe almassýǵa keldik.
Sonymen qatar, biz kórme qonaqtaryna 2020 jyly Dýbaı qalasynda ótetin EKSPO kórmesin tanystyrýdamyz. Onyń da mańyzdylyǵy, adamdarǵa, qorshaǵan ortaǵa paıdalylyǵy kóp degen pikirdemin. Qazaqstannyń kórme ótkizý tájirıbesi bizge de sabaq bolady dep oılaımyn. Osy deńgeıden kem ótkizbesek, jetistikke jetkenimiz dep bilemin.
Ingrıd, Pýklan Langa, Germanııadan kelgen saıahatshylar:
– Biz – Ortalyq Azııa elderin saıahattap júrgen juppyz (kúledi). Qyrǵyzstan men Mońǵolııada boldyq. Endi, mine Qazaqstanǵa keldik. Kórmeniń taqyryby óte jaqsy tańdalǵan. Búkil álem elderi osy másele tóńireginde oılaný kerek. Kórmeniń záýlim pavılondaryn kórip, eseńgirep qaldyq. Qazaqtar óte myqty halyq eken.
Astana qalasyn aralaǵanda da aıryqsha áserge bólendik. Bul memlekettiń qarqyndy damý jolyna túskendigin ańǵardyq. Kóp uzamaı alpaýyt elderdiń qatarynan kóretinimizge senimdimiz. О́ıtkeni, Qazaqstan qazirdiń ózinde halyqaralyq arenada belsendi.
Kýatemýano Gılem, Kongodan kelgen saıahatshy:
– Astanaǵa Kongo elin EKSPO-2017 kórmesinde tanystyrý úshin keldim. Úsh aı ishinde bilgenim, kórgenim, túıgenim mol. Astana – jańadan salynǵan kórkem qala. Bundaı deńgeıde úlken shara ótkizý arqyly jas qala ózin álemge tanytýda. Jańǵyrmaly energııa taqyryby kórme kóleminde tolyqtaı qamtyldy dep oılaımyn.
Taǵy bir unaǵany, qazaq halqy tolerantty eken. Munda eshkim bir-birin dinine qarap bólip jatpaıdy. Barlyǵy tatý ómir súrýde. Men osynda jyl saıyn ótetin dinaralyq jáne konfessııaaralyq jıyndardan habardarmyn. Bul – memleket basshysynyń keremet kóregendiginiń arqasynda uıymdastyrylatyn shara. Osy ispetti jıyndar eldiń bedelin asyryp, tanymaldyǵyn keńeıte túsedi.
Aıgúl ShERNIIаZ,
Ashat RAQUL,
«Egemen Qazaqstan»
Sýretterdi túsirgen
Orynbaı BALMURAT,
«Egemen Qazaqstan»
