«Gala Etýaleı» – bul balet ónerin baǵalaıtyndar úshin taptyrmaıtyn tartý. Álemniń eń tańdaýly da kúrdeli qoıylymdary, dańqy alysqa taraǵan bıshiler, súıikti partııalar – mundaı múmkindikti talǵampaz kórermen jibere qoımas.
Qysqasy, Almatyda aty ańyzǵa aınalǵan Marııa teatrynyń prıma-balerınasy Dıana Vıshneva men Shtýtgart baletiniń premeri Frıdeman Fogel, Úlken teatr prıma-balerınasy Evgenııa Obrazsova, Marııa teatrynyń jetekshi solısi Aleksandr Sergeev, Mıýnhen memlekettik baletiniń kóshbasshylary Osıel Gýneo men Ksenııa Ryjkova, aty álemge áıgili qazaqstandyq balerına Álııa Tanyqpaeva, Essen-Balet sańlaǵy Aıdos Zaqan, Vengrııa ulttyq baletiniń juldyzy Gergelı Leblan syndy sańlaqtar óner kórsetedi.
Osy arada A.V.Seleznev atyndaǵy Almaty horeografııalyq ýchılıshesiniń túlekteri Marııa Eıhvald, Álııa Tanyqpaeva men Aıdos Zaqan uzaq ýaqyttan beri alǵash ret týǵan jerlerinde ónerlerin pash etkeli otyrǵanyn aıta ketý lázim.
«Almaty árqashan men úshin ystyq. Men bul qalada óstim, bilim aldym... Týǵan qalamnyń turǵyndary úshin bar yqylasymdy salyp óner kórsetemin», deıdi Álııa Tanyqpaeva.
Al Aıdos Zaqan ónerdegi jolyn Abaı atyndaǵy qara shańyraqtyń qabyrǵasynda bastaǵany aıan. Onyń darynyn dostary men ustazdary joǵary baǵalaıdy. «Sondyqtan álemdik juldyzdarmen birge týǵan sahnamda óner kórsetý men úshin tek zor qýanysh emes, sondaı-aq úlken jaýapkershilik», deıdi Aıdos.
Oraıy kelgende «Gala Etýaleı» keshterin uıymdastyrýshy ArtClassic kompanııasynyń dırektory Erlan Andaǵulov óz jerlesterimizdiń óneri otandyq mádenıet úshin úlken maqtanysh sezimin týdyratynyna senimdi ekenin aıtyp otyr.
Sol sııaqty Marııa teatrynyń prımasy Dıana Vıshneva qazaqstandyq balet mektebiniń deńgeıin joǵary baǵalaı kele: «Men balet ártisteri arasynda qazaqtan shyqqan has talanttardy bilemin. Peterbýrgtegi túrli gala-konsertter men konkýrstarda jyl saıyn qazaq balet mektebiniń daryndy oqýshylary óner kórsetip, nátıjesinde eń úzdik bı toptarynyń bólshegine aınalady. Vaganova akademııasynda Qazaqstannan kelgen balalar da az emes. О́zimniń týǵan Marııa teatryma «Astana Balet» ártisteri birneshe márte iri gastrolderimen keldi. Sondyqtan men Almaty jurtymen tanysýdy taǵatsyz kútip júrmin», deıdi.
Sonymen «Gala Etýaleı» balet keshteriniń baǵdarlamasyna klassıkalyq jáne zamanaýı horeografııanyń eń jarqyn beıneleri kiredi. Bular – Dıana Vıshneva men Frıdeman Fogeldiń oryndaýyndaǵy «Onegın» baletinen pa-de-de (Djon Krenkonyń horeografııasy) jáne «Bas aınalý» (Maýro Bıgonzettıdiń horeografııasy); Evgenııa Obrazsova men Aleksandr Sergeevtiń oryndaýyndaǵy «Satanılla» baletinen «Venesııa karnavaly» pa-de-desi (Marıýs Petıptiń horeografııasy); Álııa Tanyqpaeva men Gergelı Leblannyń oryndaýyndaǵy «Elegııa» dýeti (Elena Bogdanovıchtiń horeografııasy); Marııa Eıhvald pen Aıdos Zaqannyń oryndaýyndaǵy «Shaǵý» dýeti (Katarına Kozılskaıanyń horeografııasy); Ksenııa Ryjkova men Osıel Gýneonyń oryndaýyndaǵy «Esmeralda» baletinen «Dıana men Akteon» pa-de-desi (Agrıppına Vaganova horeografııasy); Abaı atyndaǵy memlekettik akademııalyq opera jáne balet teatrynyń jetekshi solısteri Ásel Asqarova men Azamat Asqarovtyń oryndaýyndaǵy «Romeo men Djýletta» baletinen adajıo (Iýrıı Grıgorevıch horeografııasy) jáne baletti baǵalaı biletin qaýymnyń ózge de súıikti partııalary.
Aınash ESALI,
«Egemen Qazaqstan»
ALMATY
