Astana qalasynda 130-dan astam resmı qatysýshyny biriktirgen EKSPO-2017 kórmesi úkimetter men azamattar arasynda «Bolashaqtyń energııasy» taqyrybynda jahandyq dıalogqa bastaý boldy. Bul týraly Halyqaralyq kórmeler bıýrosynyń arnaıy kúni barysynda HKB bas hatshysynyń orynbasary Dımıtrıı Kerkentzes aıtty. Ol óz sózinde halyqaralyq mańyzdy sharany tabysty ótkizýge kómek kórsetkenderge, sondaı-aq kórme qonaqtaryna alǵys bildirdi.
«EKSPO-2017 kórmeler tarıhynda asyl mura qaldyrady. Oǵan kelýshiler aǵymdaǵy jyldyń jaz aılarynda áserli sáýlet ǵımarattary men qurylystardy tamashalady. Halyqaralyq kórmeler bıýrosy aldaǵy mamandandyrylǵan kórmelerge EKSPO-2017 kórmesin úlgi tutady. Sondyqtan osy jıyndy uıymdastyrýshylarǵa rızashylyǵymyzdy jetkizgimiz keledi. Kórmeniń sátti ótkizilýi – adal eńbektiń nátıjesi», dedi Dımıtrıı Kerkentzes.
Saltanatty jıynda «Astana EKSPO-2017» UK» AQ basqarma tóraǵasy Ahmetjan Esimov halyqaralyq sharaǵa 115 memleket pen 22 uıym qatysqanyn eske saldy. Kórmeniń úsh aı jumysy aralyǵynda 40 memleket basshysy, 9 úkimet basshysy, 72 syrtqy ister mınıstri arnaıy resmı saparmen kelgen. A.Esimov jobanyń barlyq seriktesterine EKSPO-2017 kórmesiniń daıyndyǵyna jáne onyń tabysty ótýine qosqan úlesteri úshin alǵys bildirdi. «Bul aýqymdy joba el ekonomıkasyna oń áserin tıgizdi jáne shamamen 50 000 jańa jumys oryndaryn ashýǵa múmkindik berdi. Kórmelerdiń tájirıbelerine jasalǵan jete taldaý barysynda atalǵan jobalar muralarynyń mańyzy zor ekendigin baıqadyq. Qazirgi kezde EKSPO-dan keıingi kezeńniń baǵdarlamasy aıaqtalýǵa jaqyn. Kórmeniń árbir sharshy metrin aldaǵy ýaqytta maqsatty qoldaný jóninde naqty jospar bekitilgen. Eń bastysy, 4 mıllıon kórme qonaǵy umytylmas áser aldy. Halyqaralyq pavılondarǵa kelýshilerdiń sany 30 mıllıondy qurady jáne atalǵan kórsetkish úshin qatysýshy memleketter usynǵan qyzyqty kontentke alǵys aıtamyn», – dedi basqarma tóraǵasy.
HKB arnaıy kúniniń mádenı baǵdarlamasy aıasynda Astana, Qytaı jáne Birikken Arab Ámirliginiń shyǵarmashylyq ujymdary óner kórsetti.
Ashat Raıqul,
"Egemen Qazaqstan"
Sýretti túsirgen Erlan Omar,
"Egemen Qazaqstan"
