Saltanatty marapattaý rásimi 30-shy Máskeý halyqaralyq kitap kórme-jármeńkesiniń aıasynda ótkizildi.
Kitaptyń avtorlary – Prezıdent Nursultan Nazarbaevtyń janynda uzaq jyldardan beri jemisti qyzmet etip kele jatqan úzeńgilester komandasy. Bul jóninde «Egemen Qazaqstan» gazetinde 2016 jyldyń 29 qarashasyndaǵy nómirinde jazylǵan bolatyn. Qazaqstannyń Reseı Federasııasyndaǵy sol kezdegi elshisi, búginde Prezıdent Ákimshiligi Basshysynyń birinshi orynbasary Marat Tájınniń bastamasymen jazylǵan Qasym-Jomart Toqaevtyń, Nurtaı Ábiqaevtyń, Ádilbek Jaqsybekovtiń, Qaırat Mámıdiń, Nurlan Nyǵmatýlınniń, Imanǵalı Tasmaǵanbetovtiń jáne Marat Tájınniń derekti ocherkteriniń jınaǵy qazirgi zamanǵy Qazaqstannyń shırek ǵasyrlyq damýyna túbirli sholý jasap, avtorlar ózderi tikeleı qatysqan barlyq oqıǵalardy, prosester men faktilerdi sýretteıdi.
Kitapta Qazaqstannyń syrtqy álemmen ózara qarym-qatynas ornatýdaǵy tartymdy tustary baıandalyp, eldiń saıası damýynyń negizgi kezeńderi, jańa elorda Astananyń boı túzeýi, demokratııalyq saıası jáne quqyqtyq júıeniń qalyptasýy jarqyn ári jan-jaqty beınelenedi. «Birinshimen birge» kitaby Memleket basshysynyń «bolmysty ózgertýdegi qabiletin, qorshaǵan álemdi jarqyn bolashaqtyń kózqarasyna saı úılestirip, maqsatty aıqyndap jáne oǵan qol jetkizýde elimizdiń barsha azamattaryn sóz júzinde emes, is júzinde toptastyrýdaǵy» biregeı kóshbasshylyq qasıetterin ashady.
Kitapty shyǵarǵan «Hýdojestvennaıa lıteratýra» baspasynyń dırektory Georgıı Prıahın Qazaqstan Prezıdentimen uzaq joldy birge júrip kele jatqan adamdardyń áńgimeleýi basylymnyń basty jetistigi ekenin aıtty. «Olar Qazaqstannyń qazirgi zamanǵy qýatty derjavaǵa aınalý jolyndaǵy el basshysynyń biregeı beınesi men atqarylǵan jumystardyń sıpatyn egjeı-tegjeıli ashyp kórsetedi. Kitapta el basshysynyń beınesi somdalady, kóshbasshy men onyń úzeńgilesteri ǵana emes, barsha halyqtyń júrip ótken joly kóz aldyńyzǵa keledi», dedi G.Prıahın. Onyń pikirinshe, Nursultan Nazarbaevtyń kóshbasshylyǵynyń arqasynda Qazaqstan táýelsizdikten meılinshe mol paıda kóre bildi.
Reseı Federasııasy Prezıdenti ákimshiliginiń burynǵy basshysy, qazirgi ýaqytta áleýmettik-ekonomıkalyq jáne ıntellektýaldyq baǵdarlamalar qorynyń prezıdenti Sergeı Fılatov Nursultan Nazarbaevty HH-HHI ǵasyr toǵysyndaǵy basty saıası tulǵalardyń biri retinde sanaıtynyn aıtty. «Qazaqstan Prezıdenti postkeńestik keńistiktegi turaqtylyqty saqtaýǵa óte kóp eńbek sińirdi, al eń bastysy, ol barlyq kúsh-jigeri men qýatyn óziniń eli men halqyna arnaıtyny maǵan erekshe unaıdy», dedi ol.
Reseı Federasııasy Federasııa Keńesiniń Halyqaralyq ister jónindegi komıtetiniń tóraǵasy Konstantın Kosachevtiń aıtýynsha, kitap formaty Qazaqstan Prezıdentiniń qyzmetine eń jaqyn aralyqtan kóz tastap, onyń tulǵalyq aýqymyn, atqarǵan isteriniń aýyr júgin, tereń jaýapkershiligin tanýǵa bolady. «Nursultan Nazarbaev – eýrazııalyq tujyrymdamanyń jalpy jurtshylyq moıyndaǵan týyndygeri», dep eske saldy senator. «Ol bul tujyrymdy eń alǵashqy bolyp jasady jáne ony dáıekti túrde satylap iske asyrýda. Eýrazııalyq ıdeıasy búkil álemge taraldy, bul iste, sózsiz, Qazaqstan Prezıdentiniń sińirgen eńbegi orasan zor», dedi K.Kosachev.
Máskeý halyqaralyq kitap kórmesi uıymdastyrý komıtetiniń tóraǵasy, Baspa jáne buqaralyq kommýnıkasııa federaldyq agenttigi jetekshisiniń orynbasary Vladımır Grıgorev Qazaqstan Prezıdenti bárimizge tarap ketken elde de tyǵyz baılanystardy saqtaýǵa bolatynyn sezindirgenin aıtty. «Qazaqstannyń jańa tarıhynyń barlyq burylystarynda: aıaldańdar, aınalaǵa kóz salyńdar, bolashaqty oılańdar, ótkendi zerdeleńder, ózderińniń tarıhtaryń men mádenıetterińdi baǵalańdar degen oı-sana úni estilip turady», dedi ol.
Eske sala ketetin jaǵdaı, Máskeýde byltyr, bir jylǵa jeter-jetpes ýaqytta tusaýy kesilgen bul kitapqa Reseı jurtshylyǵy tarapynan erekshe iltıpat tanytyldy. Is-sharaǵa kórnekti memleket jáne qoǵam qaıratkerleri, dıplomattar, ǵalymdar, saraptama jáne qoǵamdyq uıymdardyń ókilderi, belgili pýblısıster qatysty.
«Egemen-aqparat»
