Eki kúnge sozylǵan merekelik sharalardyń shymyldyǵy «Altaı – túrki áleminiń altyn besigi» atty ǵylymı-tájirıbelik konferensııamen túrildi. Dástúrge aınalǵan mańyzdy basqosýǵa Ulybrıtanııa, Reseı, Mońǵolııa, Ázirbaıjan, Túrkııa syndy memleketterdiń ókilderi qatysty.
«Altaı – san alýan etnos ókilderine ortaq rýhanı baılyq, qasterli tarıhı mura. Altaı - túsinistik pen kelisimde ómir súrip otyrǵan kóptegen ult pen ulttyń ata-qonysy. Bizdiń oblysymyzda 2010 jyldan beri Altaıdy zertteý, zerdeleý baǵytynda aýqymdy jumystar júrgizilip keledi. Búgingi shara barysynda sol ýaqyttan bergi atqarylǵan sharýalardyń nátıjeleri usynylatyn bolady», - dedi oblys ákimi Danıal Ahmetov alqaly basqosýdyń ashylý saltanatynda sóılegen sózinde. Al konferensııa qonaqtaryn ana tilimizde quttyqtaǵan Ulybrıtanııanyń elimizdegi Tótenshe jáne ókiletti elshisi Kerolın Braýn sózin jaǵymdy jańalyqpen bastap, jaqynda Londonda saq mádenıetinen syr shertetin tarıhı jádigerler kórmesi ótetinin jetkizdi.
Tumandy Albıon tórinde tuńǵysh ret uıymdastyrylǵaly otyrǵan shara barysynda Shyǵys Qazaqstandaǵy Berel qorǵandary men Shilikti jazyǵynan, ózge de qorymdardan tabylǵan qundy dúnıeler kórermen nazaryna usynylmaq. Sonymen qatar jıynda belgili arheologtar Zeınolla Samashev pen Ábdesh Tóleýbaev Berel men Zaısan aýdanynyń Aınabulaq, Qaratal aýyldary mańynda ózderi júrgizgen qazba jumystarynyń nátıjeleri jaıynda baıandady. Ymyrt úıirile kendi shahar turǵyndary drama teatrdy betke aldy. Aımaq basshysynyń bastamasymen osymen úshinshi márte ótkizilgen «Aq Ertis» halyqaralyq klassıkalyq mýzyka festıvali bıyl da joǵary deńgeıde ótti deýge bolady. Bul kúni Qazaqstannyń Halyq ártisi Aıman Musaqojaeva, «Astana opera» teatrynyń ánshisi Súndet Baıǵojın bastaǵan otandyq ánshilermen qatar Samsýn (Túrkııa) qalasyndaǵy opera jáne balet teatrynyń dırıjeri Mıhaıl Kırhgoff, Stambýl memlekettik sımfonııalyq orkestriniń bas klarnetısti Aıshegıýl Kırmanoglý, Bashqurtstannyń eńbek sińirgen ártisi Álfııa Kárimova, halyqaralyq baıqaýlardyń laýreaty Nare Argamanıan (Armenııa) syndy shet eldiń zor daýysty ónerpazdary kórermenniń kóńilin bir serpiltip tastady. Eki saǵatqa jýyq ýaqytqa sozylǵan konsertte Verdı, Mosart, Chaıkovskıı, Pýchchını, Shtraýs syndy áıgili kompozıtorlardyń týyndylary oryndaldy. «Mundaı festıvalder kórermen úshin ǵana emes, ánshiler úshin de óte paıdaly. Biz bir-birimizben aralasyp, sheberligimizdi shyńdaımyz, rýhanı jaǵynan ósip, tolysamyz. Sondyqtan da men osyndaı halyqaralyq deńgeıdegi festıvaldi uıymdastyrýshylarǵa úlken alǵysymdy aıtamyn», - dedi Aıshegıýl Kırmanoglý.
Ekinshi kúngi merekelik sharalar respýblıka alańynda jyl saıyn dástúrli túrde ótetin bal festıvalinen bastaldy. О́ńirdiń 115 omartashysy 56 tonna bal ónimderin jurt nazaryna usyndy bul kúni. Sonymen qatar qala kúni merekesine oraı shahar turǵyndary arasynda velo jarys ótti. О́skemen qalalyq ákimdigi men «Qazsınk» kompanııasy birlese uıymdastyrǵan saıystyń bir ereksheligi, qatysýshylardyń jasyna shekteý qoıylǵan joq. Olar úsh topqa (14 jastan asqan oqýshylar, stýdentter jáne eresekter) bólinip jarystyń kórigin qyzdyrdy. Shaıtan arba mingen shahar turǵyndary qalanyń negizgi kóshelerimen úsh aınalym jasap, ózderiniń sheberlikterin baıqap kórdi. Qala kúnine arnalǵan merekelik sharalar respýblıka alańynda «Gákký daýysy-2017» festıvalimen túıindeldi.
Azamat QASYM,
«Egemen Qazaqstan»
О́SKEMEN
