Tórt jyl qatarynan festıval Almaty qalasynyń turǵyndary men qala qonaqtarynyń arasynda zor suranysqa ıe boldy. Turǵyndar oqylǵan kitaptaryn basqa da qyzyqty kitaptarǵa aýystyryp alýǵa múmkindik aldy. Bıylǵy jyly da dástúr boıynsha kitap festıvali áıgili Shoqan Ýálıhanov eskertkishiniń mańynda ótti. Shara uıymdastyrýshylary «Baýyrjan» qaıyrymdylyq qory, Almaty qalasynyń ákimdigi, Eýrazııalyq franchaızıng assosıasııasy men «Nur Otan» partııasy.
– KitapFest festıvaliniń ótkizilýi taǵy bir ret almaty jurtyna qarapaıym kitaptar qajet ekenin kórsetti. Búgingi sharada ár túrli jastaǵy adamdardyń zor yqylaspen kelgenin baıqadym. Atap aıtsaq, eńbektegen baladan eńkeıgen qarttarǵa deıin festıvalǵa at salysýǵa jınaldy. Bul joba jyl saıyn keńge qanat jaıyp halyqtyń kitap oqýǵa degen qulshynysyn arttyryp keledi – deıdi «Baýyrjan» qaıyrymdylyq qorynyń joba úılestirýshisi Maıra Áljanova.
Festıval baǵdarlamasy kitaptar jármeńkesin, oqyrmandarǵa qyzyqty tanymdyq semınarlar, túrli baspalardyń kitap kórmesi men tanymal kitap avtorlarymen júzdesýdi kiristirdi. Bıylǵy jyly kitap festıvaline 25-ten astam kitap baspalary men kitap dúkenderi qatysty. Alań janynda arnaıy shatyrlar turǵyzylyp, tanymal kitaptar jeńildikpen satyldy. Ádebı semınarlardyń jankúıerlerin zamanaýı pýblısıster men aqyn-jazýshylardyń ádebıet turǵysyndaǵy pikir almasýlary qyzyqtyrdy. Olardyń arasynda I Book You jobasynyń avtory Marına Sharıpova, Aına Dosmehametqyzy, tanymal kitap vıdeoblogynyń avtory Alııa Qadyrova, jýrnalıst Mádı Mámbetovter bar. Qazaqstan Jazýshylar Odaǵynyń músheleri - "Nur Otan" partııasy Almaty qalalyq fılıaly Tóraǵasynyń orynbasary Qaıym-Munar Tabeev, "О́ner" baspasynyń Bas dırektory Áshirbek Kópishev, "An-Arys" baspasynyń Bas dırektory Kádirbek Qunypııauly, akyn Ádilǵazy Qaıyrbekov, satırık Nurtan Tólepbergenov kitap festıvaliniń ashylýynda sóz sóılep, uıymdastyrýshylarǵa alǵys aıtty. Sondaı-aq, jazýshylar shatyrynda qazaq tildi avtorlar da qalys qalmady. Máselen jazýshylar odaǵynan Ǵalym Jaılybaı, Serik Asylbekuly, Sáýle Dosjanova, Gúlzada Nıetqalıeva jáne taǵy basqa qalamgerler óz shyǵarmashylyqtarymen bólisti.
Kitap álemindegi shara aıasynan Almatynyń tanymal iri kitaphanalary da tys qalǵan joq. Olardyń daıyndaǵan baǵdarlamalary arqasynda ár oqyrman óziniń janyna jaqyn ári qajettisin tapty. Máselen, Begalın atyndaǵy kitaphana óz shatyr aımaǵynda kitaptardyń tusaýkeserlerimen qatar, túrli aksııalar men konkýrstar uıymdastyrdy.
KITAPFEST festıvali kitapqumar oqyrmandardyń bir-birimen jaqyn aralasyp oı-pikirlerin bir arnadan toǵystyrýyna múmkindik jasaýǵa baǵyttalǵan. Sharanyń taǵy bir ereksheligi kez-kelgen oqyrman arnaıy taqtaıshaǵa óziniń súıikti kitaby jaıly jazyp, ózgelerge de oqýǵa usyna alady. Basty uıymdastyrýshy «Baýyrjan» qaıyrymdylyq qory «Kitap syılap, meıirim syıla» atty qaıyrymdylyq aksııasyn bastap, festıval aıasynda Pedıatrııa ǵylymı ortalyǵynyń balalar gematologııasy jáne qan aýrýlary bólimine, narkologııalyq ortalyq pen qalamyzdyń túzetý kolonııalaryna birtalaı kitap jóneltti.
«Festıvaldiń basty maqsaty balalar men jastar arasynda kitap oqý úrdisin nasıhattap, adamdardy tehnıka men ǵalamtor jaılaǵan zamanda kitaptan bas tartpaýǵa shaqyrý. Almatylyq kitap festıvaliniń basty ereksheligi – zaman aǵymy qanshalyqty alǵa bassa da kitap oqý dástúri artta qalmaıtynyn eskerip, kitaptan nár alý árdaıym rýhanı azyq ekenin jetkizý» deıdi uıymdastyrýshylar.
Arman OKTIаBR,
«Egemen Qazaqstan»
ALMATY
