Memleket basshysynyń parlamenttik sessııanyń ashylýynda alǵa qoıǵan mindetterine sáıkes depýtattar aldaǵy ýaqytta úshjyldyq respýblıkalyq bıýdjetti qaraıtyn bolady. Budan bólek, Salyq kodeksi men keden zańdaryn jetildirý, Ulttyq Bankiniń ekinshi deńgeıli bankterge qatysty baqylaý ókilettikterin kúsheıtý, saqtandyrý júıesin damytý, dári-dármek aınalymyn retteý, memleket múddeleri men aqparat qaýipsizdigin qorǵaý jáne quqyq qorǵaý organdaryn reformalaý máselelerin talqylaıtyn bolady.
«Bizdiń barlyq josparly jumystarymyz Prezıdent aıqyndaǵan zańdardy aldyn ala muqııat pysyqtaýǵa baǵyttalýy kerek», - dedi otyrysta Senat spıkeri Q.Toqaev.
Bıýro qabyldaǵan sheshim boıynsha Konstıtýsııalyq zańnama, sot júıesi jáne quqyq qorǵaý organdary komıteti «Qazaqstan Respýblıkasy men Serbııa Respýblıkasy arasyndaǵy qylmystyq ister boıynsha quqyqtyq kómek týraly shartty ratıfıkasııalaý týraly», «Qazaqstan Respýblıkasy men Serbııa Respýblıkasy arasyndaǵy ustap berý týraly shartty ratıfıkasııalaý týraly», «Qazaqstan Respýblıkasy men Serbııa Respýblıkasy arasyndaǵy sottalǵan adamdardy berý týraly shartty ratıfıkasııalaý týraly» zań jobalary boıynsha bas komıtet bolyp belgilendi.
Budan bólek Bıýro músheleri «Orta bilim berý júıesiniń jaı-kúıi, problemalary jáne zańnamalyq retteý perspektıvalary» taqyrybyna arnalǵan parlamenttik tyńdaý ótkizýge ázirlikti talqylady. Senattyń Áleýmettik-mádenı damý jáne ǵylym komıteti uıymdastyratyn sharany 22 qyrkúıekte ótkizý josparlandy. Bıýroda senatorlardy halyqaralyq parlamenttik uıymdarǵa jáne shet memleketter parlamentterimen yntymaqtastyq toptaryna jiberý, sondaı-aq Senattyń 2017 jylǵa arnalǵan negizgi sharalar josparyna ózgerister engizý týraly máseleler qaraldy.
