Jıynda sóz alǵan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy M.Otarshıev oblysta osy jyly 53,7 myń jańa jumys oryndary ashylyp, onyń ishinde turaqty jumys oryndary 38413 oryn ekenin atap ótti.
Onyń aıtýynsha, mamandar tapshylyǵyn retteý maqsatynda «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasynyń birinshi baǵyty sheńberinde óńirde 4 584 adam tehnıkalyq jáne kásiptik bilim alyp jatsa, qysqa merzimdi kásiptik oqýǵa 9682 adam 89 mamandyq boıynsha joldandy.
Baıandamashyny tyńdaǵan ákim basqarma basshysyna 15 mamandyq boıynsha qajettiligine saı, aýyl turǵyndaryn oqytyp, kásipke beıimdeýdi aıtty. Aldymen, aýyldyq okrýg deńgeıinde atqarylatyn jumystar, odan soń aýdandyq dárejede júzege asyrylýy tıis dedi.
«Atalǵan 15 mamandyq boıynsha, ıaǵnı, tokar, temir ustasy, aǵash ustasy, elektrshi, santehnık, shashtaraz syndy mamandyqtarǵa beıim azamattardy aýyl ákimderi taýyp berýi kerek. Bul joba naqty júzege asqanda azamattar jumyspen qamtylyp, aýyldaǵy ómir súrý jaǵdaıy qala órkenıetine beıimdeler edi. Osylaısha, aýyldaǵy turmys-tirshilikti jaqsartý arqyly oblystyń deńgeıin kóteretin bolamyz»,-dedi J.Túımebaev.
Aýyl turǵyndarynyń kásibı mamandanýynan bólek, turǵyndardyń salaýatty ómir saltyn qalyptastyrý jaıynda nazardan tys qaldyrmaǵan aımaq basshysy árbir aýdan ortalyǵy men aýyldyq okrýgterde angar tıpti sport alańshalaryn salý qajettigin aıtty. Sondaı-aq, ol modýldi sport keshenderiniń qurylys jumystary Elbasynyń «Bolashaqqa baǵdar:rýhanı jańǵyrý» baǵdarlamalyq maqalasynda aıtylǵan «Týǵan jerge taǵzym» aıasynda el azamattaryn shaqyrý arqyly júrgizý kerektigin eske saldy.
Jalpy Ońtústik Qazaqstan oblysynda buqaralyq sportty damytý maqsatynda aımaqtaǵy eldi mekender men kóp qabatty úılerdiń aýlalarynda jyl basynan beri 57 sport alańshalary paıdalanýǵa berilse, onyń 20-y demeýshiler esebinen salynǵan.
