Chempıonat erler jáne qyzdar arasynda klassıka, rapıd jáne blıs sanattary boıynsha jeke-jeke ótkizildi. Sonymen qatar, týrnırde tuńǵysh ret komandalar juptyq básekede kúsh synasty.
Klassıkalyq sanat boıynsha ótken oıynda jerlesimiz Hákimjan Eleýsinov aldyna jan salmady. Ol jeti týrda múmkin bolǵan jeti upaıdyń bárin alyp, osymen úshinshi ret álem chempıony atandy. Osy jeńisinen keıin chempıonǵa «Qazaqstan Respýblıkasynyń eńbek sińirgen sport sheberi» ataǵy berildi.
Hákimjan Eleýsinov 2012 jyldan bastap Qyzylorda oblysynyń toǵyzqumalaqtan aǵa jattyqtyrýshysy qyzmetin atqaryp keledi. Budan buryn ol 2012 jyly Chehııada, 2015 jyly Almatyda ótken álem birinshilikterinde top jarǵan bolatyn. Bul synda taǵy bir qazaqstandyq Saılan Matylov kúmis medal ıegeri atansa, qyrǵyzstandyq toǵyzqumalaqshy Belek Mambetalıev qola júldeni qanaǵat etti.
Qyzdar arasyndaǵy tartysta álemniń birneshe dúrkin chempıony Ásel Dalıevanyń juldyzy joǵary boldy. Týrnır barysynda tamasha nátıjege qol jetkizgen ol osymen besinshi ret álem chempıony degen ataqty ıemdendi. Qyrǵyzstandyq Jańyl Saǵynbekova ekinshi orynǵa turaqtasa, jerlesimiz Aqerke Kenjebekova qola medal ıegeri atandy.
Erler arasyndaǵy blıs oıynynda Qyrǵyzstannan kelgen toǵyzqumalaqshylar eshkimge des bergen joq. Bul eldiń Kýban Ibrogımov jáne Anarbek Djamakeev syndy oıynshylary, tıisinshe birinshi jáne ekinshi oryndardy jeńip aldy. Al qyzdar arasyndaǵy synda qazaqstandyq toǵyzqumalaqshylar Qymbat Nóserova men Dıana Kenına úzdik shyǵyp, altyn jáne kúmis júldelerdi ózara bólisti.
Rapıd jarysynda Nurbek Qabıev Qazaqstan qorjynyna altyn júlde salsa, Hákimjan Eleýsinov qola medaldy mise tutty. Qyzdar arasynda óner kórsetken Lına Kárimova da el namysyn laıyqty qorǵap, chempıon atandy. Ásel Dalıeva bolsa, bul syndy kúmis medalmen aıaqtady.
Komandalyq juptasyp óner kórsetýde quramynda Serik Aqtaev pen Ásel Dalıeva oınaǵan Qazaqstannyń birinshi komandasyna teń keler qarsylas tabylmady. Elimizdiń ekinshi komandasy úshin oınaǵan Janat Qaımoldın men Roza Raıymbekova juby kúmis júldege qol sozsa, Mońǵolııa eliniń toǵyzqumalaqshylary Jasulan Rysbek pen Quralaı Qulbek qola júldeni qanjyǵaǵa baılady.
Taǵy bir aıta ketetin jaıt, álem chempıonaty barysynda Dúnıejúzilik toǵyzqumalaq federasııasynyń kezekti otyrysy ótip, onda qazaqtyń ulttyq zııatkerlik oıynynyń bolashaqtaǵy damý strategııasy talqylandy. Sonymen qatar, birqatar kadrlyq sheshimder qabyldandy. Sonyń nátıjesinde, Alıhan Baımenov Dúnıejúzilik Toǵyzqumalaq federasııasynyń prezıdenti bolyp qaıta saılandy. Jan Reshıtskıı (Shveısarııa), Raýf Ozgen (Túrkııa), Asylhan Sakeı (Mońǵolııa), Dastan Qapaev (Qazaqstan) budan bylaı vıse-prezıdenttik qyzmetti atqaratyn bolsa, Maqsat Shotaev uıymnyń Bas hatshysy bolyp bekidi.
Toǵyzqumalaqtyń kelesi dúnıejúzilik dodasy 2019 jyly Túrkııada ótedi. Al Eýropa chempıonaty 2018 jyly Fransııada uıymdastyrylsa, sol jyly Mońǵolııada Azııa birinshiligi jalaý kótermekshi.
Jalpy, bul jolǵy álem chempıonaty dúnıe júzi boıynsha toǵyzqumalaq oıynyna degen qyzyǵýshylyqtyń arta túskenin baıqatty. Týrnırge qatysýshylardyń sany jyldaǵydan kóp bolǵany óz aldyna, bul dúbirli básekege bıyl tuńǵysh ret Aýstrııa, Kamerýn, Polsha jáne Ýkraına elderinen de toǵyzqumalaqshylar kelip, óner kórsetti. Iаǵnı, qazaqtyń zııatkerlik oıyny jyl ótken saıyn aıasyn keńitip, óziniń dárejesi boıynsha álemdik deńgeıge kóterilip keledi.
Qaırat ÁBILDA,
«Egemen Qazaqstan»
