Boıjetkendi qutqarǵan kýrsant

Kýrsanttar polısııa pýnktine qaraı júgire jóneldi, bara bolǵan oqıǵany habarlady da, kópirge qaraı keri umtyldy. О́zenniń qyz sekirgen jaǵy tereń bolatyn, kezekshilikte júrgen jol-patrýldik polısııasynyń qyzmetkeri, polısııa kishi serjanty Ádiljan Jomartov «Jedel járdem» shaqyrýǵa kiristi. Oqıǵa bolǵan jerge adamdar da jınalyp qalypty, qutqarý úshin sýǵa tús­ken eki er kisi qyzdy alyp shyǵa almady. Al esinen tanyp qal­­ǵan qyz sýǵa bir batyp, bir shy­ǵyp barady. Erkebulan kýrsant kıimin sheshti de, kópirden qyz batyp ketken tusqa sekirip ketti. Torǵaı ózeni jaǵasynda ósken jigit sýda jaqsy júzetin. Ol súńgip baryp, batyp ketken qyzdy shashy­nan tartyp, bir qolymen, jal­dap jaǵaǵa qa­raı júze bas­tady. Ja­ǵa­da­ǵy­lar janyn shúberekke túıip tur­­dy. Sýdyń sýyǵaly qashan, onyń ústine sol kúni aýa raıy da salqyn boldy. Erkebulan esinen tanyp qalǵan qyzdy jaǵaǵa ja­qyn­datqanda Ádiljan Jo­martov kıimi­men sýǵa túsip, onyń aldynan shyqty. Bul kezde Erke­bulan da sharshap qalǵan edi, qyzdy jaǵaǵa súıregen soń, ol da sýdyń taıyz jerine kelip, aıaǵyn tirep, kúsh aldy.

Jurt qyzdy ólip qaldy dep oılady. Erkebulan men onyń kýrstasy Nurbol, kishi serjant Ádiljan men onyń áriptesi Saıat Imanbaev qyzǵa alǵashqy kómek kór­sete bastady. Polısııa qyzmetkerleri jú­rekke massaj jasaǵanda, kýr­sant­tar da saýattylyq tanytyp, qyzdyń tizesin ishke tirep, aıaq­taryn sozǵylap, qozǵaltty. Osy kezde aýzynan sý lyq ete qal­dy da, demala bastady. Sol sát­te jetken «Jedel járdem» qyz­dy qalalyq aýrýhanaǵa alyp ketti. Sóıtip sýǵa sekirý ar­qyly ózine qol jumsaǵan 21 jastaǵy qyz kýrsant Erkebulan Tólebekovtyń erlikke para-par isi arqasynda ajal tyrnaǵynan aman qaldy. Ol qazir aýrýhanada emdelip jatyr.

– Biz Nurbol ekeýmizdiń tez júgirgenimiz sondaı, kópirge sanaýly sekýndtarda jettik. Sý muzdaı eken, biraq mende aǵyp ketemiz-aý degen oı bolǵan joq. Oılanyp jatýǵa ýaqyt mur­sat ber­meıdi ǵoı mundaıda, óıt­ke­ni sýǵa tunshyqqan adam bes mınýt­tan asqanda tynysyn toq­ta­tady. Sondyqtan qutqaryp úl­gerý kerek dep sheshtim. Qyzdy aman alyp shyqqannan keıin ajalmen arpalysqanda ne ómir, ne ólim ekenin 1-2 mınýt ǵana sheshetindigin oılaǵanda, árıne adam retinde deneń titirkenetini ras, – deıdi Erkebulan.

Endi mınýt emes, birer sekýnd keshikkende ózine qol jumsaǵan qyz ajal tyrnaǵynda keter edi, al bul joly jas jigittiń batyl áreketi arqasynda aman qaldy.

Oblystyq ishki ister basqar­ma­sy tarapynan jol-patrýl­dik polısııasy qyzmetkerleri men akademııa kýrsanty Erkebulan Tólebekov jáne oǵan kómektesken do­sy Nurbol Sámke marapatqa usy­nyldy.

Názıra JÁRIMBET,
«Egemen Qazaqstan»

QOSTANAI