Stepnogorda Qanysh Sátbaevqa eskertkish qoıyldy

Elordadan eki júz shaqyrym­daı jerde ornalasqan Stepnogor oblys ónerkásip óniminiń 30 paıyzdaıyn óndirip kele jatqan óndiristi qala sanalady. Jer qoınaýy baılyqtaryn óndirýge baılanysty qurylǵan ónerkásip oryndarynyń kóptep salynýy Qanysh Imantaıulynyń atymen tikeleı baılanysty. О́ıtkeni akademık kezinde elimizdegi jer qoınaýy baılyqtarynyń kartasyn jasaǵanda osy mańnan tabylǵan mıneraldarǵa tolyq sıpattama berip ketken kórinedi. Sonyń arqasynda qala gúldenip, órkenıetke qulash jaıǵan. Qala kúnin atap ótý sharalary Q.Sát­baev eskertkishiniń ashylýymen oraılastyrylǵany da sondyqtan. Onyń ústine eskertkishtiń boı kóterýi Elbasynyń «Bolashaqqa baǵdar: rýhanı jańǵyrý» at­ty baǵdarlamalyq maqalasyn júzege asyrýmen tikeleı baılanysty. 

Uly ǵalym Qanysh Imantaı­uly Sátbaev eskertkishiniń ashylý saltanaty tańerteńgisin ótti. Sharaǵa qala turǵyndary men qonaq­­tary kóp jınalypty. Onyń ústine sol kúni aýa ra­ıy da jylyp, aspan ashyq bol­dy. Jı­nalǵan qaýym aldynda Step­­no­gor qalasynyń ákimi Ánýar Kúmpekeev, Aqmola oblysy ákiminiń orynbasary Aına Músi­rálıeva, qazaqtyń tuńǵysh ǵaryshkeri Toqtar Áýbákirov jáne Qanysh Sátbaevtyń neme­resi Álıma Jarmaǵambetova tanymal tulǵa Serikbek Dáýkeı sóz sóıledi. Shahar kórkine sán bere túsken eńseli eskertkishtiń jabyndysyn elimizdiń tuńǵysh ǵaryshkeri Toqtar Áýbákirov pen akademıktiń nemeresi, hımııa ǵylymdarynyń doktory Álıma Jarmaǵambetova ashty. 

«Sizder eskertkishti óz qala­lary­ńyzda ornatyp otyrsyzdar. О́sip kele jatqan bala­lary­myzdyń onnan biri Qanysh aǵamyzdaı bolsa, onda eńbektiń esh ketpegeni. Ol qaıda júrse de qazaqtyń, eldiń mereıin ósirdi. Anglııa parlamentinde sóılegen kezde Cherchıl «Aıtyńyzshy, qazaq­tardyń barlyǵy da siz sekildi bıik pe», dep suraǵan kórinedi. Sonda ol «Qazaqtardyń ishinde men eń alasasymen, al halqym menen de bıik tur», dep jaýap qatqan kórinedi. Olaı bolsa akademık rýhyna taǵzym eteıik. Ol bizben máńgi súre beredi», dedi qaharman ǵaryshker.

Eskertkish vokzal aldyndaǵy alańqaıda or­na­lasqan. Jobanyń avtory jáne qola eskertkishti jasaǵan Qazaqstan sýretshileri odaǵynyń múshesi Azat Baıarlın bolsa, onyń júzege asýyna «Kókshetaý joldary» JShS qoldaý bil­dirgendigin aıta keteıik. 

Reti kelgende Stepnogor qala­synyń ákimi, «Bolashaq» túlegi Ánýar Kúmpekeevtiń sózi de áserli shyqqandyǵyn atap ótkenimiz oryndy. Ákim óz sózinde eskertkish ashý uly tul­ǵaǵa taǵzym ǵana emes, bola­­shaqtaǵy uly isterge degen um­tylys ekendigin erekshe ek­pinmen aıtty. Al oblys ákiminiń orynbasary Aına Músirálıeva óńir basshysynyń quttyqtaýyn jetkize kelip, Stepnogor qala­sy­nyń «Uly dala­­da týǵan qala» degen aıshyqty maǵyna bere­tindigine nazar aýdartty. Reti kelgende Qanysh Sátbaevqa ar­nalǵan eskertkish­ter sonymen birge Qaraǵandy, Pavlodar, Jez­qazǵan, Ekibastuz, Tom jáne Sátbaev qalalarynda bar eken­digin qaperge sala keteıik.

Eskertkishti ashýǵa arnalǵan mıtınginiń sońy kórnekti ǵalym Q.I.Sátpaevtyń eline sińir­gen ólsheýsiz eńbegine arnal­ǵan ǵylymı-praktıkalyq konferensııaǵa ulasty. Sondaı-aq osy kúni «Batyr» balalar men jasóspirimder klýbynda jańadan ashylǵan kúres zalynda sporttyń qazaqsha kúres jáne erkin kúres túrlerinen endi balalar úshin jattyǵýlar bastalmaq. Jalpy, «Batyr» klýbynda 2016-2017 jyldarǵa arnalǵan oqý jyldarynda jasy 7 men 18 aralyǵyn­daǵy 1656 oqýshy qatysqan 56 sport­tyq-buqaralyq sharalar ótkizilgen. Jáne de qala kúnine oraı «RE-BIOMED ǵylymı-praktıkalyq ortalyǵy» JShS-nyń alǵashqy «GENOME Ademy» degen 11 ataýdan turatyn ónimderiniń jappaı satylymǵa shyǵarylýyna arnalǵan tusaýkeser rásimi bolyp ótti. Bunda negizinen tonıkter men krem túrindegi bıokosmetıka shyǵaratyn «Kosmetıkalyq ónimderdi óndirý» jobasy júzege asyrylýda. Kásiporyn dırektory Jánibek Kenjebaevtyń aıtýynsha, joba Dúnıejúzilik bank, «Bıotehnologııa» ulttyq ortalyǵy jáne jergilikti ákim­dik qoldaýymen nemis áriptes­terimen birlese júzege asyryl­ǵan. Bıokosmetıkaǵa qoldan ja­sal­­ǵan hımııalyq zattar emes, or­ganıkalyq komponentter qosylǵandyǵy da atalmaı qal­mady. Joba quny 180 mıllıon teńge bolsa, kásiporyn jylyna 3 mıllıon quty jáne 20 mıllıon ampýlada suıyqtyq túrindegi ónimderdi shyǵarýǵa qaýqarly eken. Kásiporyn ázirge jylyna 200 myń dana quty jáne 1,3 mıllıon ampýla suıyqtyq túrindegi ónimder shyǵarýdy jos­parlap otyr. Endi ónim elimiz ben kórshiles Reseı aýmaǵyna satýǵa shyǵarylady dep kútilýde. Osylaısha Stepnogor qalasy Qazaqstannyń ǵana emes, sonymen birge Ortalyq Azııanyń sulýlyq ındýstrııasy ortalyǵyna aınalýy da ǵajap emes. J.Kenjebaev Stepnogor qalasynda kásip­­oryn ashýdaǵy sebebin munda­ǵy bıotehnologııalyq zertteý­lerdi júrgizetin ǵylymı baza­nyń ornyq­qandyǵymen túsin­dirdi. 

Jalpy, merekelik shara sport­tyq saıystarmen, konsert­tik baǵdarlamalarmen, balalar shyǵar­mashylyǵymen árlen­diri­lip, keshkisin otshashýǵa ulasty. 

Asqar TURAPBAIULY,
«Egemen Qazaqstan»

Aqmola oblysy