– Bul degenimiz aýdanda túsindirý jumystary báseń júrip jatqanyn kórsetedi, – dedi oblys ákimi Erlan Qoshanov. – Adamdarǵa memlekettik qoldaýdy qalaı alýǵa bolatynyn, qandaı mehanızmder bar ekenin durystap túsindirý qajet. Aýdandy damytý kerek. Men búgin jergilikti halyqtyń jaǵdaıy jaqsy ekenine kózim jetti. Alaıda onymen toqtap qalý durys emes, ári qaraı damý qajet. Sizderdiń múmkindikterińiz de, jerlerińiz de mol. Sondyqtan jumys isteńizder. Biz bolsaq óz tarapymyzdan kómek kórsetýge daıynbyz.
Aımaq basshysy óziniń orynbasarlaryna Aqtoǵaı aýdanynyń damý baǵdarlamasynyń júzege asyrylýyn jiti nazarǵa alýdy tapsyrdy.
Sonymen qatar, E.Qoshanov jumys sapary barysynda Aqtoǵaı aýdanyndaǵy ekotýrızmniń damýymen tanysty. Aımaq basshysy bıylǵy jyly 50-ge jýyq shetel azamattaryn qarsy alǵan «Sulý tas» qonaqúıinde boldy.
Shabanbaı bı aýylynyń turǵyny Asqar Muratov osydan úsh jyl buryn 10 adamǵa shaqtalǵan ulttyq naqyshtaǵy qonaqúı ashqan. Týrıstik joba «Jumyspen qamtýdyń jol kartasy-2020» baǵdarlamasy boıynsha qoldaý alǵan.
– Qazir sheteldik týrıster keremet qonaqúılerde toqtaǵylary kelmeıdi. Olar bizdiń turmysymyzǵa qyzyǵýshylyq tanytady, bizdiń tabıǵatymyzǵa tań qalady. Sheteldikterge qazaqtyń taǵamdary óte unaıdy. Biz olardy halqymyzdyń bolmysymen, mádenıetimen jáne dástúrlerimen tanystyrýǵa tyrysamyz, – deıdi qonaqúı qojaıyny.
Nıet bildirgender kıiz úıge de jata alady. Qonaqtarǵa arnalǵan as máziri tolyqtaı ekologııalyq taza ulttyq taǵamdardan quralǵan.
Aýyl kásipkeri bıylǵy jyly «Nomadic Travel Kazakhstan» týrıstik kompanııasymen kelisimshartqa otyrǵan.
– Bul «Týǵan jer» memlekettik baǵdarlamasynyń júzege asyrylyp jatqanynyń bir mysaly, – dep atap ótti Erlan Qoshanov. – Osyndaı kásipkerlikti damytyp, oǵan qajetti kómek kórsetý kerek.
Shabanbaı bı aýylynan 3 shaqyrym qashyqtyqta taý baýraıynda «Araı» demalys lageri ornalasqan. Qazirgi tańda ol qaıta qalypqa keltirýdi qajet etedi. Oblys ákimi óziniń orynbasarlary men basqarma basshylaryna bul máseleni qarastyrýdy tapsyrdy.
Jergilikti aqsaqaldar bolsa aımaq basshysynan joldardy jóndep, Shabanbaı jáne Qyzylaraı aýyldaryna qatynaıtyn kólikti retteýlerin ótindi. Bıylǵy jyly Aqtoǵaı aýdanynda jalpy uzyndyǵy 396 shaqyrymdy quraıtyn oblystyq mańyzy bar joldar jóndeledi. Bul baǵytqa 77,9 mln teńge bólingen.
Al Qyzylaraı aýylyna avtobýs júrgizý máselesin Erlan Qoshanov jolaýshy tasymaldaýshy mekemelerdiń basshylarymen sheshýdi tapsyrdy.
Mıras ASAN,
«Egemen Qazaqstan»
Qaraǵandy oblysy,
Aqtoǵaı aýdany
