– Men jarqyn tústerdi unatamyn, álemdi tek qana ashyq boıaýlar arqyly sezinemin. Ásirese, ulttyq boıaý – janyma jaqyn. Jan dúnıemde tynyshtyq ornaǵanda ǵana sýretter salamyn, – deıtin óreli óner ıesiniń, «Astana», «Dastarqan», «Kıiz úı», «Báıterek», «Han Shatyr», «Dombyra ustaǵan qyz» atty gobelenderine eshkimge uqsamaıtyn erekshe tústik úılesim tán.
Sheber sýretshi kórmege kelýshilermen sulýlyqqa degen qushtarlyǵymen bóliskisi keledi. Onyń toqyma kompozısııalarynyń erekshe obrazdy áleminde ótken men búgin, baqyt, mahabbat, sulýlyq týraly poetıkalyq jáne fılosofııalyq oılar birtutas oıý-órnektik astarly mánge ıe.
Balnurdyń kartınalaryndaǵy tústerdiń úılesimdiligi men túrli-tústi reńkterdiń birikken baılanysy, boıaýdyń ashyqtyǵy kórermenniń kóńil-kúıin kóterip, adam boıyna qýat beredi.
Sýretshi óz eńbekterinde ǵasyrlar boıy qalyptasqan túster men belgilerdiń kúrdeli nyshandaryna da úlken mán beretinin óner synshylary da aıtyp júr. Onyń keskindemeleri men gobelenderinde dástúrli ónerdiń jańa múmkindikteri kórsetiledi ári sózben jetkize almaıtyn erekshe tartym-
dylyǵyn saqtap qalady.
Eń bastysy, Balnurdyń shyǵarmashylyǵymen birge ǵylymı qyzmetti qatar alyp júrgeni qýantady. Ý-shý, álem-jálem dańǵaza keshterden boıyn aýlaq salatyn sýretshi kóshpendi órkenıettiń ǵajaıyby sanalatyn kórkem kıiz jáne qazaq mádenıetiniń, dekor-órnek beınelemesi men onyń zamanaýı dızaınerlik tájirıbede qoldanylýyn, kóne jáne ortaǵasyrlyq kezeńde qazaq ulttyq kıiminiń tarıhı jáne etnografııalyq damýyn zertteýmen aınalysady.
Dızaıner retinde ábden kemeline kelgen Asanova ersi eksperımentterge barmaı-aq, óz álemindegi básekelesterin moıyndata bildi.
Balnurdyń shyǵarmashylyǵynda ózindik motıvten ajyramaıtyn, buljymaıtyn tujyrymdy alǵa súıreıtin tamasha stıl bar ekendigin ataǵan jón.
Aınash ESALI,
«Egemen Qazaqstan»
ALMATY
