Oqý-jattyǵý barysynda Shymkent qalasynda jalpy qalalyq seısmo jattyǵý, praktıkalyq túrde shatyrly qalashyqty jaıý is-sharasy ótkizildi, dep habarlaıdy OQO ákimdiginiń baspasóz qyzmeti.
Búgin oblysta bastalǵan oqý-jattyǵýdyń aıasynda oblys ákimdiginde Ońtústik Qazaqstan oblysynyń ákimi Janseıit Túımebaevtyń tóraǵalyǵymen arnaıy jıyn ótti. Májiliske Qazaqstan Respýblıkasynyń ortalyq atqarýshy organdarynyń, Ulttyq ulan Bas qolbasshylyǵynyń ókilderi men jedel top músheleri qatysty.
Jıynda tıisti sala jetekshilerine shtabtyq mashyqtanýdy júrgizý kezinde atqarylatyn jumystar boıynsha mindetter belgilenip berildi. Tótenshe jaǵdaı oryn alǵanda zardap shekken jáne baspanasyz qalǵan halyqty qabyldaý úshin jasalǵan shatyrly qalashyqtyń daıyndyǵymen búgin oblys ákimi J.Túımebaev arnaıy baryp tanysty.
Qalashyqtyń jumysymen tanysý barysynda ákim Shymkent qalasy 7 balldyq kúshi bar jer silkinisi bolýy múmkin joǵary seısmıkalyq belsendi aımaqta ornalasqanyn aıtyp, shatyrly qalashyq turǵyndardyń qaýipsizdigi úshin asa qajet ekenin jetkizdi.
Shatyrly qalashyqtyń qurylymyna qala ákimshiligi, qabyldaý pýnkti, tirkeý orny, aqparat pen baılanys pýnkti jáne poshta-telegraf kiredi. Bul qalashyqtyń ákimdigi jergilikti atqarýshy organdardyń laýazymdy tulǵalarynan quralatyn bolady. Shatyrly qalashyqta turǵyndar sýyq mezgilde turǵyn orynmen, taǵammen, sýmen, jyly kıimmen qamtamasyz etiledi. Sonymen qosa, medısınalyq, qoǵamdyq tártipti qorǵaý, órtke qarsy kólik quraldarymen qamtamasyz etiledi. Jalpy, shatyrly qalashyqta 100 myńnan astam adamdy ýaqytsha ornalastyrýǵa bolady.
