Atalǵan sabaqtar quqyqtyq tártip áskerleriniń respýblıkadaǵy barlyq qurylymdyq áskerı bólimderinde ótkiziletin bolady. Áskerge rýh berýshi tárbıeshi ofıserler Otan kúzetinde júrgen jaýyngerlerge, jalpy áskerı ujymnyń ár múshesine Qazaqstan Respýblıkasynyń Tuńǵysh Prezıdenti, Elbasy Nursultan Ábishuly Nazarbaevtyń syndarly saıasaty men táýelsizdik jyldary elimizdiń jetken jetistikteri jaıly keń turǵyda túsindirip, tárbıe saǵaty retinde dáris ótkizedi.
Elbasy sabaqtary ár túrli taqyryptardy qamtyǵan. Máselen, «Elbasynyń Otan jaıly aıtqandary», «Elbasynyń halyqtar dostyǵy men birligi jaıly ulaǵattary», «Elbasynyń otbasy jaıly aıtqandary», «Elbasynyń el tarıhy jaıly aıtqandary», «Elbasynyń ulttyq qaýipsizdik jaıly baılamdary» jáne taǵy basqa Prezıdentimizdiń asa ózekti tolǵam-oılary jaýyngerlik ujym músheleriniń rýhyn kóterý men shyńdaýǵa jolbasshy tárbıe ózegi retinde alynǵan.
Alǵashqy sabaq Almaty qalasyndaǵy Ulttyq Ulannyń «Ońtústik» óńirlik qolbasshylyǵynda tárbıeshi ofıserlermen jáne áskerı qoǵamdyq uıymdardyń ókilderimen ótkizildi. Shymyldyq ashar sabaqtyń taqyryby: «Elbasynyń til týraly jáne ulttyq kod jaıly aıtqan tolǵamdary» dep ataldy. Sabaq barysynda qazaq tiliniń latyn álipbıine aýysý máseleleri, elimizdegi úshtildilik saıasaty men qazaq tiliniń ulttyq kody men qazaq halqynyń mádenıetin saqtaýdaǵy aıryqsha róli keńinen aıtyldy. Sondaı-aq, shara barysynda Elbasynyń memlekettik til jáne shet tilder jaıly aıtqan oı-tolǵamdary basylǵan beıne-aýdıo jazbalar tyńdarman nazaryna usynyldy.
– Elbasy halqymyzdyń arqa súıer alyp tulǵasy, taý tuǵyry. Nursultan Ábishuly Nazarbaevtyń osy ýaqytqa deıingi atqaryp jatqan tolaǵaı isterine barshamyz kýágermiz. Halqyn sheksiz súıip, eliniń bir qajetine jarasam dep tynym tappaı júrgen óz ultynyń asyl perzenti, Elbasymyzdyń arqasynda shırek ǵasyr ýaqytynyń ishinde elimiz jarqyn damý jolynan ótti. Kezinde arman bolǵan ıgi isterimiz júzege asyp otyr. Qazaq halqy ózge eldermen terezesi teń, keregesi keń turǵyda damyp, órkendep keledi. Bul eldiń mańdaıyna bitken baq. Elbasynyń osy ýaqytqa deıin aıtyp kele jatqan oı-tolǵamdary úlken tárbıelik mánge ıe. О́zderińiz biletindeı, Tuńǵysh Prezıdentimiz alýan taqyryptarda ár jıyn, keńesterde, óziniń jazǵan kitaptarynda, maqalalarynda úlken keleli oılar, elimizdi jarqyn bolashaqqa bastar baǵdarlardy kórsetip keledi. Máselen, til, shekara, ulttyq qaýipsizdik, ıadrolyq qarýlanýdyń adamzatqa qateri, ultaralyq dostyq, Otan, týǵan jer, ult, taǵy da kóptegen taqyryptarda aıtqan oılary jeke azamatty da, ujymdardy da tárbıeleýge paıdalanylar tunyp turǵan qaınar kóz. Mine, biz osyny eskerip, endigi kezekte Elbasynyń sózderin dáıekke ala otyryp, jeke quramdy tárbıelemekpiz. Elbasynyń aıtqan ár taqyryptaǵy oılary bir, bir saǵat bolyp jiktelip, mamandarymyzben muraǵattan alynǵan beınejazbalarymen dáıektelip, jeke quramǵa usynylatyn bolady – deıdi «Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Sabyrjan Súleımenov.
Jobany uıymdastyrýshylar, tárbıelik-tanymdyq sabaqtardyń basty maqsaty – Otan qorǵaýshylardy eldi súıýge, halyqqa, Elbasyna qaltqysyz qyzmet etýge tárbıeleý, áskerı qyzmetshilerdiń qoǵamdyq-azamattyq ómirge belsendi aralasýyna septesý, tulǵalar boıynda sheshendik ónerdi damytý ekenin aıtady.
Arman OKTIаBR,
«Egemen Qazaqstan»
