Elshiniń paıymdaýynsha, keıingi ýaqytta Indonezııada el ortalyǵyn basqa qalaǵa kóshirý máselesi jıi kóterilip júr. Osyǵan sáıkes, elde arnaıy komıssııa qurylyp, zertteý jumystaryn júrgizý tapsyrylǵan.
«Astanaǵa kelgen saparynda Indonezııa vıse-prezıdenti Iýsýf Kalla Elbasy Nursultan Nazarbaevtan el ordasyn Almatydan Astanaǵa aýystyrý tájirıbesi jóninde surady. О́ıtkeni, ǵylymı ortada, baspasóz betterinde astanany basqa shaharǵa ne aralǵa aýystyrý jóninde áńgime qozǵaldy. El prezıdenti Ulttyq damý agenttigine sheteldik ozyq tájirıbelerdi jınaqtap, Indonezııa ereksheligin eskere otyryp joba jasaýdy tapsyrdy», dedi A.Orazbaı.
Elshi Indonezııanyń mundaı batyl qadamǵa barýyna qazirgi astana Djakartanyń halyqqa lyq tolýymen baılanystyrady. Búginde Indonezııa ortalyǵynda 15 mıllıonǵa jýyq halyq turady. Osy máselelerdi eskere otyryp el astanasyn kóshirýdi josparlaǵan Indonezııa úkimeti Qazaqstannyń 1997 jylǵy qadamyn joǵary baǵalap, tájirıbe alýǵa nıetti.
Sonymen qatar, A.Orazbaı Indonezııa vıse-prezıdenti Iýsýf Kallanyń Astanaǵa sapary barysynda talqylanǵan basqa máselelermen de bólisti. A.Orazbaı bul elde Islam bank júıesi jaqsy damyǵanyn tilge tıek etti. Osyǵan sáıkes, Qazaqstan tarapy Indonezııamen tájirıbe almasýǵa ázir ekenin jetkizgen. Sondaı-aq, ındonezııalyq Islam bankteri Astanada ashylatyn Halyqaralyq qarjy ortalyǵynda jumys isteýge shaqyrylyp otyr.
A.Orazbaı Indonezııa kásipkerleri Qazaqstanda dári óndiretin farmasevtıkalyq zaýyt salýǵa múddeli ekenin málimdedi. Onyń aıtýynsha, eldegi úlken kompanııalardyń biri Rama Group basshylyǵy Qazaqstanǵa kelip, mundaǵy naryqty zerttep ketipti.
Degenmen, eki el arasyndaǵy saýda jáne ekonomıkalyq qarym-qatynasty damytýǵa kólik-logıstıkalyq baılanystyń nasharlyǵy kedergi bolyp otyr. Bıylǵy alǵashqy jarty jyldyqta Indonezııa men Qazaqstan arasyndaǵy taýar aınalymy 15,2 mıllıon dollardy quraǵan. Bul – byltyrǵy merzimmen salystyrǵanda 65,3 paıyzǵa joǵary.
A.Orazbaı saýda jáne ekonomıkalyq baılanysty nyǵaıtýdyń eki baǵytyn atap kórsetti. Onyń pikirinshe, Qytaıdaǵy Lıanıýngan porty arqyly Qazaqstan taýaryn Indonezııaǵa eksporttaýǵa múmkindik bar. Elshi ekinshi baǵyt retinde Irandaǵy Bender-Abbas portyn esepteıdi. Áıtse de, ázirge saraptaý jumystary júrgizilip jatyr.
Indonezııa halqy sany jóninen álemde 4-orynda turǵan memleket. Islam memleketteri arasyndaǵy eń úlkeni jáne demokratııaly el sanalady. Qazaqstan men Indonezııa arasyndaǵy dıplomatııalyq kelisim 1993 jylǵy 2 maýsymda ornaǵan.
Abaı Asankeldiuly,
«Egemen Qazaqstan»
