– Búgingi «Embimunaıgaz» – geologııalyq barlaý, munaı ken oryndaryn paıdalaný, munaı men gaz daıyndaý jáne óndirý jumystaryn júrgizetin bolashaǵy zor zamanaýı munaı kompanııasy. Kásiporynnyń bolashaqta resýrstyq bazany keńeıtý, jańa baǵyttardy damytý, tereń uńǵymalardy burǵylaý jáne basqa da jobalar boıynsha josparlary kóp. Olardyń bárin biz kásibı jáne yntymaǵy zor ujymymyzben birge sátti júzege asyratynymyzǵa senemin, – dep atap ótti óz sózinde «Embimunaıgaz» AQ basqarma tóraǵasy Ánýar Jaqsybekov.
Saltanatty jıyn barysynda kásiporynnyń 40 qyzmetkeri «Munaı-gaz salasyn damytýdaǵy úlesi úshin», «Embiniń 95 jyldyǵy» medaldarymen, Energetıka mınıstrliginiń, «Samuryq-Qazyna» UÁQ AQ, «QazMunaıGaz» Ulttyq kompanııasy» AQ, «QazMunaıGaz» Barlaý О́ndirý» AQ-tyń Qurmet gramotalarymen, «QazMunaıGaz» Ulttyq kompanııasy» AQ Estelik belgilerimen jáne «Alǵys hattarymen» marapattaldy.
Al eń basty marapat ujym músheleri úshin ortalyq keńseniń avtoturaǵy aýmaǵynda daıyndalypty. Embiniń úzdik jumysshylaryn bul jerde sý jańa «Nıva-Shevrolet» avtokólikteri kútip turdy.
– Kompanııanyń úlken merekesine oraı biz ár óndiristik qurylymdyq bólimsheniń úzdik eńbekshilerine 6 avtokólikti syıǵa tartyp otyrmyz. Osylaısha, «Embimunaıgaz» jankeshti eńbekteri men mamandyqqa degen adaldyǵy úshin munaıshylarǵa alǵysyn bildiredi! – dedi Á.Jaqsybekov.
Baǵaly marapatqa ıe bolǵandardyń barlyǵy jumysshy mamandyǵynyń ókilderi.
Qajenbaı Ábdikárimov – «Jaıyqmunaıgaz» MGО́B-de tehnologııalyq qondyrǵylar operatory. Saıt Asanov – «Jylyoımunaıgaz» MGО́B-de munaı jáne gaz óndirý operatory. Qazbek Qoshaev – «Qaınarmunaıgaz» MGО́B-de munaı jáne gaz óndirý operatory. Jumajan Baesenov – «Dossormunaıgaz» MGО́B-de uńǵymalardy jerasty jóndeý operatory. Ǵatıet Ábdirahmanov – «Embimunaıenergo» basqarmasynyń «Qulsary» aýdandyq elektr torabynyń elektromonteri. Jumajan Sársenov – О́TQjJK basqarmasynyń júk qarmalaýshysy.
Jumajan Baesenovtiń óndiristegi jalpy eńbek ótili – 44 jyl. Onyń 41 jyldan astam ýaqytyn ol jer asty jáne kúrdeli jóndeý qyzmetine arnaǵan. Súıikti isine berile jumys jasaǵan Jumajan osynshama ýaqyttyń ishinde densaýlyǵyna baılanysty demalysqa da shyqpaǵanyn baıqamapty! Kásiporynnyń kadr qyzmeti osyny aıtqan kezde qatty tańqaldy. Munyń bári ol jumysqa degen adal nıetiniń jáne únemi sportpen aınalysqannyń jemisi dep biledi. Jumajan sporttyq sharalardan eshqashan tys qalmaıdy, voleıbol oınaıdy. Tórt ulynyń biri ákesiniń jolyn qýyp, munaıshy bolǵan.
– Eńbek jáne demalys jaǵdaıyn týdyryp qana qoımaı, ony jetildirip otyratyn súıikti kompanııama alǵys aıtamyn. Men eńbekke 1973 jyly aralasyppyn, sol kezde qandaı qıyn jaǵdaılarda jumys jasaǵanymyz esimde. Qazir barlyq jerde avtomattandyrylǵan júıeler engizilip jatyr, olar prosesterdi ońtaılandyryp, eńbek qaýipsizdigin kúsheıtedi. Qyzmetkerler jaıly jataqhanalarda demalady. Biz únemi shıpajaılarǵa joldamalar alyp turamyz. Endi, mine, bizdiń eńbegimizge oraı avtokólik tabystap jatyr, – deıdi óz qýanyshyn jasyra almaǵan munaıshy.
Mereıtoıǵa qaramastan kompanııa qol jetkizgen tabystarmen toqtalmaq emes. Josparda jańa munaı ken oryndaryn ashý mindeti tur. Qazirgi tańda «Embimunaıgaz» AQ-qa birneshe jańa kelisimsharttyq terrıtorııany, sonyń ishinde Kaspıı mańy oıpatynda ornalasqan bolashaǵy bar Zabýryn jáne Jaıyq alańdaryn berý máselesi sheshilýde. Jáne de kompanııanyń kadrlyq áleýetine de tııanaqty mán berý jalǵasyn tappaq – jas qyzmetkerlerdiń damýyna úlken kúsh jumsalsa, ardagerlerge qurmet kórsetiledi.
Baqytgúl BABASh,
«Egemen Qazaqstan»
