«Eń basty jetistik - osy kórmeni jeńip alýymyzda. 162 memleket ótkizgisi keldi. Kórmelerdiń tarıhy 100 jyldy quraıdy. Ár taqyrypta, ár baǵytta dúnıejúzinde kórmeler ótkiziledi. Osynyń aldynda Mılandaǵy kórmeni baryp kórgen edim. Ol ánsheıin ýaqytsha jasalǵan ǵımarattardyń ishinde ótti. Bitkennen keıin barlyǵyn taratyp alyp ketti. Sondyqtan eń mańyzdysy, biz jas el bolǵannan keıin Qazaqstandy dúnıejúzine kórsete bilýimiz kerek. Munyń tóńireginde áli kóp jumys jasaý qajet», - dedi Elbasy.
QR Prezıdentiniń atap ótýinshe, EKSPO-2017 kórmesiniń ózegi bolǵan balamaly energııa qazirgi ǵylym men tehnıkanyń eń ozyq úlgisi sanalady.
«Kórme bitti. Kórme bitkennen keıin ǵımarattardyń barlyǵy beker qalmaıdy. Bizdiń pavılonymyz Qazaqstannyń mýzeıi retinde qalady. Eki pavılonda qarjy ortalyǵy bolady. Bir pavılonda Qazaqstannyń kórmesi bolady», - dedi Nursultan Nazarbaev.
Memleket basshysynyń sózine qaraǵanda, munan bólek, bir pavılonda IT-startaptar parki ashylady. Onda jastarǵa, ǵalymdarǵa jańalyqtar ashýǵa barlyq múmkindik jasalady. Sonymen qatar taǵy bir pavılonda mektep oqýshylaryn bilimge, mamandyqqa baýlıtyn ortalyq bolady.
«Ony koreılermen birge jasap jatyrmyz. Ol da jastarǵa paıdaly», - dedi Elbasy.
Qazaqstan Prezıdenti kórmege qansha adam kelgenin, onyń qandaı paıdasy bolǵanyn da aıtty.
«2 mılllıon adam keledi dep oılap etik, 4 mıllıonǵa jaqyn adam keldi. Jalpy, ary-beri kirip shyqqan adamdardyń sany 25 mıllıonnan asty. Astanaǵa, Qazaqstanǵa paıdasy kóp boldy. 1400 qazaqstandyq kompanııa qatysyp, qurylys materıaldaryn berdi, qurylys jumystaryna qatysty. Olar 640 mlrd teńgeniń qarajaty ıgerdi. Qonaq úılerdiń , meıramhanaldardyń , dúkender men konsert zaldarynyń barlyǵy toldy. Olardyń barlyǵy aqsha tapty, bıznes kóterilip, qala bıýdjetine úlken qarjy quıyldy. Osynyń barlyǵy paıdaly. Negizgisi búkil dúnıejúzinen, 185 elden adamdar keldi, Qazaqstannyń oblystarynan múldem Astanany kórmegender keldi», - dedi Memleket basshysy.
