Oǵan belgili ǵalymdar, jazýshylar, Parlament depýtattary, oblys basshylary men Qostanaı jurtshylyǵy men qala qonaqtary qatysty.
Oblys ákimi Arhımed Muhambetov oblys jurtshylyǵy men qonaqtardy eskertkishtiń ashylýymen quttyqtady, onyń jasalýyna qol ushyn sozǵan barlyq azamattarǵa alǵys aıtty. Aımaq basshysy halqymyzdyń ulttyq maqtanyshynyń biri qolbasshy, mámileger, memleket qaıratkeri, batyr Jánibek Shaqshaqulyna ornatylǵan eskertkish Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan mejeli mindetterdi júzege asyrýdyń tamasha kórinisi ekenin aıtty.
«Jánibek tarhanǵa ornatylǵan eskertkishtiń orny da beker tańdalǵan joq. Áýejaıdan kelgen qonaqtar babamyzdyń ulttyq rýhty kóteretin eńseli eskertkishine qarap, eldigimizge, birligimizge súısinsin degen nıetpen qalanyń basty qaqpasyna ornattyq», dedi Arhımed Begejanuly.
Jánibek batyrdyń kindik qany Torǵaıdyń qunarly topyraǵynda tamǵan bolatyn. Jergilikti jerde Jánibek batyrǵa Qostanaı qalasynda eńseli eskertkish ornatý jóninde bastama kóterilip, ony belgili akademık, qoǵam qaıratkeri Kenjeǵalı Saǵadıev qoldady. «Jánibek tarhan» atty qoǵamdyq qor qurylyp, eskertkish túgeldeı sol qor qarjysyna ornatyldy.
«Shaqshaq Jánibek qıly zamanda qalmaqtyń batyryn jekpe-jekte jeńgen has batyrdyń biri. Mámileger retinde kórshi eldermen qatysty, eldiń eldigin, birligin arttyrýǵa, memlekettikti jasaýǵa atsalysqan. Halqy qýatty memleket, onyń erkindigi, táýelsizdigi bolýyn ańsaǵan edi», dedi eskertkish ornatýda bastamashyl topqa jetekshilik jasaǵan belgili akademık, saıası qaıratker Kenjeǵalı Saǵadıev.
Eskertkishtiń avtory belgili músinshi Qadyrhan Kákimov.
Názıra Járimbet,
«Egemen Qazaqstan»
QOSTANAI
