Jıynda «Aqparattyq Qazaqstan – 2020» memlekettik baǵdarlamasynyń júzege asyrylýy jáne ondaǵy zańdylyq máselesi qaraldy. Sonymen qatar densaýlyq saqtaý júıesindegi sybaılas jemqorlyqqa qarsy is-qımyl boıynsha qabyldanyp jatqan sharalar máselesi de qozǵaldy.
Basqosýdy ashqan Gúlshara Ábdiqalyqova Parlamenttiń úshinshi sessııasynyń ashylýynda Nursultan Nazarbaev densaýlyq saqtaý salasyn el damýynyń mańyzdy áleýmettik máni bar basym baǵytynyń biri retinde ataǵanyn aıtty.
Is-shara barysynda Aqparat jáne kommýnıkasııalar mınıstri Dáýren Abaevtyń jáne Bas prokýror Jaqyp Asanovtyń baıandamasy tyńdaldy.
Baıandamashylardyń málimetine sáıkes, baǵdarlamany iske asyrýdyń negizgi maqsatty kórsetkishteri oń qarqyn alyp otyr. Maqsatty 40 kórsetkishke merziminen buryn qol jetkizildi (48%). Máselen, 2017 jyly azamattardyń kompıýterlik saýattylyq deńgeıi 76%-dan asty, al josparlanǵan meje 65% bolatyn; ulttyq jerserik jelisi abonentteriniń sany josparlanǵan 500 myńnan asyp túsip, 1,2 mln-nan artty.
Ekinshi másele boıynsha Densaýlyq saqtaý mınıstri Eljan Birtanov pen Sybaılas jemqorlyqqa qarsy is-qımyl bıýrosynyń basshysy Talǵat Tatýbaev baıandama jasady. Mınıstr densaýlyq saqtaý salasyndaǵy jemqorlyq áreketterdiń aldyn alý boıynsha qabyldanǵan sharalar týraly málimdedi.
Otyrysta sońǵy 2 jylda bul sala boıynsha tirkelgen sybaılas jemqorlyq sıpatyndaǵy qylmys sany 2 ese óskeni málimdeldi. Tegin medısınalyq kómektiń kepildik berilgen kólemi aıasynda dári-dármek jáne medısınalyq qyzmetterdi satyp alý, farmasevtıkalyq kompanııalarmen qarym-qatynas máselelerine qatysty, sondaı-aq dári-dármek formýlıarlaryn qalyptastyrý júıesinde, sertıfıkattaý rásimderinde jáne t.b. salalarda eleýli qaterler anyqtaldy.
Komıssııa otyrysynyń qorytyndysy boıynsha densaýlyq saqtaý salasyndaǵy sybaılas jemqorlyq qaterlerin joıý jóninde tapsyrmalar berildi.
