Rejısser Sábıt Qurmanbekovtiń «Oralman» fılminde basty róldi somdaǵan akter Dýlyǵa Aqmolda 5-11 qyrkúıek aralyǵynda Tatarstanda ótken XIII Halyqaralyq musylmandar kınosy festıvalinde «Úzdik er adam róli» júldesimen marapattaldy.
Osylaısha 15 qyrkúıekten bastap elimizde prokatqa shyǵatyn kartınanyń joly bolyp tur. Halyqaralyq kınosynshylardan bıik baǵasyn alyp, kórermenderin tapty.
Atalmysh kartına HH ǵasyrdyń otyzynshy jyldarynda surqııa saıasattyń saldarynan álemniń ár shalǵaıyna tarydaı shashyraǵyn qandastarymyzdyń qasireti men taýqymetin, saǵynyshy men atalar amanatyn arqalaıdy.
– Tolyqmetrajdy kartınalarda somdaǵan rólderim ishindegi bul meniń alǵashqy jeńisim, óte qýanyshtymyn. Bul tek meniń ǵana tabysym emes, rejısser Sábıt Qurmanbekovtyń, operator Mars Ýmarovtyń, qoıýshy sýretshi, kompozıtordyń, sonymen qatar barlyq túsirý tobynyń eńbegi. Olardyń barlyǵyna alǵysymdy bildire otyryp, osy jeńispen quttyqtaımyn, – dedi akter Dýlyǵa Aqmolda.
Oraıy kelip turǵanda, festıvaldyń «Úzdik fılm» júldesin túrik rejısseri Mustafa Qaranyń «Kalandra yzǵary» fılmi, al «Úzdik rejısser» júldesin úndi rejısseri Mangesh Djoshı («Djoshı jonýshy» fılmi úshin) ıelengenin aıta ketelik. Sonymen qatar Reseıdiń eki kartınasy – «Amýn» fılmi «Úzdik ssenarıı» júldesimen marapattalsa, «Sofıchka» fılminiń operatory Aırat Iаmılov úzdik operator atandy. Al «Úzdik áıel adam róli» júldesi «Áıel kúni» fılminiń úsh aktrısasyna buıyrdy.
Atalmysh halyqaralyq musylmandar kınosy festıvali – 2005 jyldan beri Tatarstanda ótkizilip kele jatqan Reseıdegi iri kınofestıvaldardyń biri.
Festıval uıymdastyrýshylarynyń aıtýynsha, bul kınoforýmnyń maqsaty – musylman elderdiń fılmderin úlken ekranǵa shyǵaryp, dinı ǵana emes, adamı qundylyqtardy da dáripteý, ultaralyq dıalog qalyptastyrý bolyp tabylady.
Aınash ESALI,
«Egemen Qazaqstan»
ALMATY
