Sultanmahmut ult úshin kúresken aqyn, óleńderi jalyndy, rýhty. Jyl tańdaýy-Sultanmahmut shyǵarmashylyǵyna túskeni-kópten kútip júrgen maqsat edi. Jyl saıyn oblys ortalyǵynda aqynnyń ómirimen shyǵarmashylyǵyna arnalǵan ǵylymı-tájirıbelik konferensııa ótip turady.
Jerlesterin de, Sultanmahmutty zertteýshi ǵalymdardy aqynnyń óleńderiniń ultqa, qazaqqa degen erekshe lebi, rýhy tartty. Negizgi bastaýy elimiz táýelsizdik alǵan eleń-alań shaqta, 1992 jyly alǵash ret aqynnyń týǵanyna 100 jyl tolýyna arnalyp ótken-di. Odan keıingi joldy «Toraıǵyrov oqýlaryn» dástúrli ótkizý bastamasyn Sultanmahmut Toraıǵyrov atyndaǵy memlekettik ýnıversıtet óz qolyna aldy.
-Sultanmahmuttyń shyǵarmashylyǵyn oqyp tanysý kezinde «Bir el-bir kitap» sharasynyń qajettiligin túsindik. Shyǵarmalarynyń deni lırıka, áleýmettik máselelerdi qoldaǵan saıası lırıka. Alash tanýǵa úles qosty. Árbir jas, árbir stýdent aqyn shyǵarmalaryn oqyp, tanysqandary ózderi úshin, rýhanı oıanýlaryna sebepker dep oılaımyn,- deıdi Uljan Sabyrhan.
Kezinde Júsipbek Aımaýytov Toraıǵyrovtyń murasyn jınap, aqynnyń ǵylymı ómirbaıanyn jiktep jazyp ketipti. Aımaýytovtyń bul tálimi búgin de mańyzdy.
-Sultanmahmut 27 jas qysqa ómir súrip, sońyna mazmuny rýhty mol shyǵarmashylyq mura qaldyrdy. Aqynnyń poezııasynda erkindiktiń dabyly estiledi. О́leńmen jáne prozamen jazylǵan romandar, fılosofııalyq jáne áleýmettik poemalar, ocherkter jazdy. Shyǵarmashylyǵy erkin qoǵam, qazaqtyń erkindigi týraly armanǵa toly, elge, jerge degen uly sezimnen turady,-deıdi stýdent Mádına Tileýbaeva.
Iá, Sultanmahmuttyń eldik, egemendikti ańsaǵan qubylysy bólek shyǵarmashylyq murasyn ádebıetshilerdiń, zertteýshilerdiń halqyna jetkizgenshe asyǵatyndarynyń basty maqsaty da- Alash ıdeıasynyń jańǵyryp, jalǵasyp urpaǵyna jetkizý ekenin túsindik.
Farıda Byqaı,
«Egemen Qazaqstan»
Pavlodar
Sýretti túsirgen:
Rýfına Torpısheva
