Foto: Aıan ÁBDÝÁLI, «Egemen Qazaqstan»
Is-sharany Japonııanyń elshiligi men Japonııa qory birlese otyryp uıymdastyrdy. Negizgi maqsat – Kúnshyǵys halqynyń mádenıetin dáripteý. Kórmeniń ashylýynda alǵysózdi Japonııanyń Qazaqstandaǵy Tótenshe jáne ókiletti elshisi Itıro Kavabata aldy.
– Bul jyljymaly kórme alǵash ret 2003 jyly bastaý alǵan. Sodan on jyl ishinde, ıaǵnı 2013 jylǵa deıin álemniń túkpir-túkpirinde uıymdastyrylyp keldi. Árbir eldiń halqy erekshe qyzyǵýshylyqtaryn bildirip, jyly-jyly lebizderin bildirip jatty. Arada bir jyl úzilisten keıin 2014 jyly qaıta qolǵa aldyq. Sol jyly Amerıkadan bastap, Azııa elderin araladyq. Mine, endi jolymyz Qazaqstanǵa da tústi, – dedi Itıro Kavabata.
Sonymen qatar, ol EKSPO kórmesi jaıly aıta ketýdi umytpady. Jahandyq kórmede Japonııa pavılonyn kóptegen qazaqstandyqtardyń aralaǵanyn aıtty. Osyndaı halyqaralyq is-sharalardyń arqasynda Qazaqstan men Japonııa qarym-qatynasy burynǵysynan da nyǵaıa túsetinin málimdedi. Budan bólek, ol qos memleket arasyndaǵy dıplomatııalyq baılanystyń ornaǵanyna da shırek ǵasyr tolǵanyn eske salyp ótti.
Kórmeniń ashylýynda sóz alǵan Ulttyq mýzeı dırektorynyń orynbasary Maral Baltyshev japon eliniń damyǵan memleketterdiń biri ekenin aıta kelip, mádenıetine de qysqasha toqtalyp ótti.
Kórmege kelgen árbir jan kúndelikti ómirde qoldanatyn turmystyq zattardy, sondaı-aq ınterer buıymdardy kóre alady. Qyzyǵy sol, eksponattardyń 90-ǵa jýyǵy 2010 jyldan keıin jasalsa, taǵy 11 zat halyqtyń soǵystan keıin tutynǵan buıymdary.
Kórmege kelgen árbir adam fotoapparat, planshet sekildi qurylǵylardyń birneshe túrin kóre alady.
Budan bólek, kásibı shabandozdar men búldirshinderge arnalǵan velosıped te bar.
Sý ótkizbeıtin matalar, birneshe qaltasy bar kúrteshe, balalardyń sanasyn jetildirýge arnalǵan erekshe kýbıkter de bul kórmeden qalys qalmady.
Aıan ÁBDÝÁLI,
«Egemen Qazaqstan»
