Qanat Islam 24.kz telearnasyna suhbat berip, bolashaq josparlarymen bólisti, – dep habarlaıdy Qsport.kz portaly.
Astana qalasynda boks keshin ótkizip, 25-jeńisine qol jetkizgen QAZAQ aldaǵy josparlary men qarsylasy Brendon Kýktyń áleýeti jaıly aıtyp berdi.
Qanat Islam: «Jekpe-jekke daıyndyǵym óte jaqsy boldy. Qazaq eli menen nokaýt kútti. О́ıtkeni Almatydaǵy jekpe-jegimde nokaýtty kóre almaǵan edi. Men de qarsylasymdy 1 raýndta-aq nokaýtqa túsirgim keledi, alaıda aldyńdaǵy turǵan qapshyq emes, óziń sııaqty jatpaı-turmaı daıyndalǵan sportshy ǵoı. Kýk maǵan qaısarlyǵyn, ońaı shaǵylatyn jańǵaq emes ekendigin rıngte sezdirdi. Jankúıerler tarapynan qansha qysym kórse de, sharshy alańda ózin erkin sezindi. Allaǵa shúkir, elime jarqyn jeńis pen keremet boks keshin syılaǵanyma qýanyshtymyn», – dedi.
Sonymen qatar QAZAQ aldaǵy jekpe-jekterin HBO kanaly kórsetý múmkindigin de atap ótti. «Kanadalyq boksshymen bir deńgeıde edik. Osy jekpe-jekte kimniń úlken shaıqastarǵa joly ashylatyny aıqyndalý kerek edi. HBO, Show time kanaldary ekeýmizge de kelisimshart usynyp, bolashaqta jekpe-jekterimizdi kórsetý týraly sheshim shyǵarýdy uıǵarǵan. Jalpy, bul jekpe-jekti HBO kanalynyń túsirýi josparynda boldy. Alaıda biz Ulttyq arna men Qazsport arnasymen kelisip qoıǵan soń, ol arnamen kelisimshart jasaspadyq. Endi bolashaqta HBO kanaly elimizge kelip jekpe-jekterimdi túsirýi múmkin», – dedi Qanat.
Saryarqa velotregine jınalǵan qalyń kórermenniń qoldaýy jaıly sóz qozǵap, «Shetelde óner kórsetsem de, elimizde judyryqtassam da basty maqsat – eldiń abyroıyn asqaqtatý. Kók týdy jelbiretemiz dep júrgennen soń, ár jeńis men úshin óte qymbat. Sen úshin, Táýelsiz eliń, jany qazaq qandastaryń taqymyn qysyp, qoldaý kórsetip turǵanda eshqandaı aıanyp qalýǵa bolmaıdy. Sharshy alańda janyńdy salyp judyryqtasýyń kerek. Astanadaǵy jekpe-jegime Amerıkadan kelgender elimizdi kórip, qatty tańǵaldy. Elimizdiń qonaqjaılyǵy men ásem qalamyzǵa tánti bolyp, maǵan Amerıkada ne istep júrsiń? dedi. Meniń osy jekpe-jegimnen keıin, promoýterime Amerıkadan kóp habarlasyp jatyr. Qazaqstandaǵy úlken arenalardy kórip, halyqtyń sportqa degen qushtarlyǵyn baıqaǵan soń, olar da Qazaqstanda jekpe-jek ótkizýge qulshynys tanytyp otyr. Bolashaqta Astana men Almaty qalasy kásipqoı bokstyń otany bolýy da múmkin», – deıdi QAZAQ.
Áńgime barysynda Qazaq kásipqoı boksynyń deńgeıi týraly da sóz qozǵaldy.
«Jalpy, qazaqstandyq kásipqoı boksshylar álemdegi eń úzdik kúrzi judyryqty bylǵary qolǵap sheberleriniń qataryna kiredi dep tolyq senimmen aıta alamyn. Astanada ótken boks keshi sonyń aıqyn dáleli bola alady», -dedi.
Bolashaq qarsylastar týraly.
«Meniń boksta júrgenime 20 jyldaı, kásipqoı boksta 6 jyl ýaqyt boldy. Qazirgi tańda Kotto bolsyn, Pakıao bolsyn kez kelgen qarsylaspen judyryqtasýǵa daıynmyn. Alla qalasa, Táýelsizdik kúnine oraı, taǵy bir jekpe-jek ótkizýim múmkin. Sporttan ketkennen keıin, QAZAQ promoýshen kompanııasynyń joǵary deńgeıge jetkizip, árbir qazaq boksshysy álemniń kez kelgen túkpirinde jekpe-jek ótkize alatyn jaǵdaıǵa jetkizgim keledi», – deıdi qazaqtyń Qanaty.
Eske sala keteıik, Qanat Islam sońǵy jekpe-jegin Astana qalasynda Brendon Kýkke qarsy ótkizip, 9-raýndta tehnıkalyq nokaýtpen jeńiske jetken bolatyn. Sóıtip, otandasymyz birinshi orta salmaqtaǵy WBO, NABO jáne WBA Inter-Continental chempıondyq belbeýlerin qorǵap qaldy.
