Foto: Orynbaı BALMURAT, «Egemen Qazaqstan»
Saltanatty is-shara elorda tórindegi «Qazaqstan» ortalyq konsert zalynda ótti. Bıylǵy ulttyq konkýrsqa elimizdiń túkpir-túkpirinen bas-aıaǵy 16 januıa iriktelip alyndy. Bul otbasylardyń ishinde jasy júzden asqan, ótken ǵasyrdyń san túrli soqpaqtarynan ótip, búgingi kúnge aman-esen jetken danagóı qarııalarymyz da boldy.
Osymen tórtinshi jyl qatarynan uıymdastyrylǵan baıqaýdyń jeńimpazy 7-15 qyrkúıek aralyǵynda ǵalamtor jáne sms daýys berý arqyly anyqtaldy.
Nátıjesinde, ulttyq baıqaýdyń laýreaty ataǵyna Qaraǵandy oblysynan kelgen Kýrılenko otbasy laıyq dep tanyldy.
Bul áýlettiń aqsaqaly – Nıkolaı Semenovıch Kýrılenko. Ol – Uly Otan soǵysynyń ardageri. Temirtaý qalasyndaǵy metallýrgııalyq kombınatta slesar, sheber, bólim basshysy laýazymdarynda taban aýdarmastan 45 jyl qyzmet etken. Qarııa «II dárejedegi Otan soǵysy» ordeni, «Erligi úshin» medali, «Uly Otan soǵysynda Germanııany jeńgeni úshin», sondaı-aq «Georgıı Jýkov» sekildi birqatar medaldarmen marapattalǵan.
Al jubaıy Marııa Fedorovna Kýrılenko bolsa, soǵys ýaqytynda tylda eńbek etken. Olardyń otaý quryp, bir shańyraq astynda ómir súrgenine 66 jyldyń júzi bolypty. Kýrılenko áýleti Temirtaýda 2016 jylǵy úzdik otbasy ataǵyna ıe boldy. Búginde olar bes balasynan 10 nemere, 7 shóbere súıip otyr. Úlgili otbasynyń balalary túrli salada qyzmet etip júr.
– Jasym 70-ke keldi, – dep shatasyp qaldy qýanyshy qoınyna syımaǵan qarııa Nıkolaı. – Bıyl 90 jastamyn. Osyndaı úlken konkýrsty uıymdastyrǵan Elbasymyzǵa alǵysymdy bildirgim keledi. Ol Uly Otan soǵysy ardagerleri men tyl eńbekkerlerin únemi nazarynda ustap, bizge qoldaý kórsetip keledi. Elimizge tynyshtyq, barlyq otbasyǵa baqyt tileımin! Alǵa, Qazaqstan! – dedi Nıkolaı Kýrılenko.
«Mereıli otbasy» ataǵyna ıe bolǵan Kýrılenko áýletin Memlekettik hatshy Gúlshara Ábdiqalyqova quttyqtap, shaǵyn avtobýstyń kiltin tabys etti. Ol Elbasy Nursultan Nazarbaevtyń konkýrsqa qatysqan árbir otbasy týraly tolyq habardar ekenin málimdedi. Sonymen qatar, jınalǵan qaýymnyń aldynda Memleket basshysynyń quttyqtaý sózin oqyp berdi.
Hatta: «Qymbatty, qazaqstandyqtar! Qurmetti konkýrsqa qatysýshylar! Barshańyzdy «Mereıli otbasy» ulttyq konkýrsynyń óz máresine jetýimen shyn júrekten quttyqtaımyn! Otbasy qaı zamanda deni saý qoǵamnyń jáne myqty memlekettiń negizi bolyp keledi. Táýelsizdik alǵannan bergi shırek ǵasyrda qazaqstandyq tatý otbasynda patrıotızm, eńbeksúıgishtik, jańa qoǵam qurý qundylyqtarymen tárbıelengen tutas býyn ósip keledi. Olar – bilimge qushtar, básekege qabiletti, jańa álem men ınnovasııalarǵa ashyq Úshinshi jańǵyrýdy júzege asyrýshylar. Qazaqstannyń bolashaǵy ózara syılastyq pen tatýlyqqa uıyǵan. Jaqyndaryna janashyrlyq jasaýmen birge ózgelerge kómegin aıamaıtyn, árkim óziniń súıikti isimen aınalysatyn, urpaqtan urpaqqa jalǵasqan birlik pen kelisim qundylyqtary saqtalǵan otbasylary dep senimmen aıta alamyn. Elimizdiń tiregi bolǵan osynaý qundylyqtar árdaıym bizdiń baılyǵymyz bolyp qala bermek. Barshańyzǵa zor densaýlyq, aman-saýlyq, beıbitshilik pen ósip-órkendeý tileımin! Shańyraqtaryńyzǵa shattyq, jaılylyq pen molshylyq saltanat qursyn», delingen.
«Mereıli otbasy» konkýrsy alǵash ret 2014 jyly uıymdastyrylǵan bolatyn. Baıqaýdyń eń alǵashqy jeńimpazy – Ahmetovter otbasy.
– Mundaı úlken jarystyń alǵashqy jeńimpazy bolǵanymdy maqtan tutamyn. Áli esimde, Elbasynyń qolynan avtokólik kiltin alyp turǵanymda, maǵan kúlimsirep qarap turyp: «Myna kólikti satpa», dedi. Árıne mundaı baıqaýdan alǵan tulparymdy búginge deıin óz ıgiligime paıdalanyp kelemin. Otbasy – bereke-birliktiń qaınar kózi. «Mereıli otbasy» konkýrsy otbasy bedelin nyǵaıtýǵa, óskeleń urpaqtyń boıynda patrıottyq sezim qalyptastyrýǵa úlken septigin tıgizedi, – dedi Kentaı Ahmetov.
Aıta keteıik, tusaýy kesilgen jyly baıqaýǵa 1298 otbasy qatyssa, bıyl elimizdiń túkpir-túkpirinen 2879 januıa qatysýǵa nıet bildirgen eken. Bul ótken jylmen salystyrǵanda 11,6%-ǵa artyq (2016 jyly – 2579 otbasy). Qatysýshylardyń 36,2%-y (1041 otbasy) kóp balaly otbasylar (2016 jyly – 1065 otbasy). Baıqaýǵa 20 etnos pen 27 ınternasıonaldyq otbasy qatysqan.
Aıan ÁBDÝÁLI,
«Egemen Qazaqstan»
