Alǵashqy raýndtarda Saýl belsendilik tanytyp, Golovkınge birneshe soqqysyn dartyta bilse, otandasymyz qorǵanysta qatelik jiberip jatty. Degenmen, djeb soqqylary Alvareske dóp tıdi.
Úshinshi-tórtinshi raýndta Gennadıı jyldamdyǵyn arttyryp, jekpe-jekke kirise bastady. Alvarestiń osal tusyn taýyp, búıirden soqqylaýǵa tyrystyp baqty.
Besinshi raýndta Golovkın shabýyldy údete túsip, «Kanelony» buryshqa tyqsyryp, birneshe anyq soqqy jasady. Bul raýndta Alvares tek qorǵanyspen boldy. Gennadıı bul úsh mınýtty óz paıdasyna sheshti.
Altynshy raýndta Saýl biraz sharshaǵandaı kórindi. Buryshtan-buryshqa qashyp, qorǵanyspen júrdi. Biraq, reti kelgende Golovkınge soqqy jasap júrdi.
Jekpe-jektiń eń qyzǵan shaǵy segizinshi-toǵyzynshy raýndta boldy. Eki raýnd boıy Golovkın qarsylasyn qyspaqqa alyp, meksıkalyq boksshyǵa soqqy jasaýǵa esh múmkindik bermedi. Bul eki raýndta da otandasymyz upaı sanymen basym boldy.
Kezdesý aıaqtalyp jatqanyn sezgen eki boksshyda 10-raýndta upaı alý úshin kezek-kezek soqqy almasty. Qos boksshy birinshi nómirmen jumys isteýge tyrysqan boldy. Ashyq aıqastan qashqan joq.
Sońǵy 12-raýndta Alvares birinshi raýndtaǵy basymdylyǵyn qaıta qolǵa aldy. Biraq, rýand ortasyna kelip, «Kanelo» sharshap qaldy. Sóıtip, Golovkındi qaıta-qaıta qushaqtap, ýaqyt sozýmen boldy. Osy arqyly ol Golovkınge soqqy jasaýǵa múmkindik bermedi. Bul da onyń taktıkalyq júrisi edi. Raýnd sońynda Alvares Golovkınniń soqqysynan nokdaýn alyp qalǵandaı kórindi.
Sóıtip, kezdesý qorytyndysy tóreshilerdiń sheshimimen aıaqtaldy. Birinshi tóreshi jeńisti Alvareske berse, ekinshi tóreshi Gennadıı jeńiske jetti dep eseptepti. Alaıda, úshinshi tóreshi kezdesýdi teń dep tapty.
Osylaısha, 35-jastaǵy Gennadıı Golovkınniń karerasyndaǵy tuńǵysh teń nátıjesine qol jetkizdi. Al, qarsylasy Saýl «Kanelo» Alvarestiń mansabyndaǵy ekinshi teń jekpe-jegi. Ol buǵan deıin 2006 jyly óziniń otandasymen teń judyryqtasqan bolatyn.
Eske sala keteıik, Gennadıı Golovkın ekinshi ret 12 raýnd tolyq judyryqtasyp otyr. Golovkınge bul jekpe-jekte 3 mıllıon dollar, al, onyń básekelesi Alvares 5 mıllıon dollar syıaqy berildi dep habarlanǵan.
Aıta keteıik, Gennadıı Golovkın orta salmaq dárejesinde WBA (Super), IBO jáne WBC nusqalary boıynsha álem chempıony ataǵyn saqtap qaldy. Ol WBA (Super) belbeýin 18-shi, IBO belbeýin 16-shi jáne WBC belbeýin 3-shi ret qorǵady.
Álı BITО́RE,
«Egemen Qazaqstan»
