Vengrııa pavılony elektr jáne qalalyq josparlaý salasyndaǵy eń jańa qondyrǵylardy kórsetti. Taqyryp el energııasynyń qoljetimdi kózderiniń geografııalyq jáne únemdi erekshelikterine negizdelgen. Basty nazar kún energııasyna bólindi, biraq Vengrııa pavılonynyń kórneki sheshimi negizinde ósimdik energııasyn tıimdi paıdalanýdy bildiretin О́mir aǵashy ıdeıasy, ony qoldanýdyń jetik tetigi usynyldy. Installıasııalaý negizinde kórsetilgen О́mir aǵashyna pavılon qonaqtary 30 000-ǵa jýyq tilekterin qaldyrǵan eken. Al kelýshilerdiń sany shamamen 300 000-ǵa jetken eken. Bul – kórmeniń eń kishkentaı pavılondarynyń biri úshin tamasha kórsetkish bolyp tabylady.
Vengrııa pavılonyn Ulttyq ekonomıka mınıstri Mıhaı Varga, Syrtqy ister jáne saýda mınıstri Peter Sıııarto, Aýyl sharýashylyǵy mınıstri Shandor Fazekash, EKSPO-2017 kórmesiniń komıssary Nandor Kartezı, Vengrııanyń Qazaqstandaǵy Elshisi Andrash Baranı, Qazaqstan Syrtqy ister mınıstri Qaırat Ábdirahmanov, Premer-Mınıstrdiń keńesshisi jáne Aýyl sharýashylyǵy mınıstri Asqar Myrzahmetov syndy laýazymdy qonaqtar tamashalaǵan. Eki eldiń úkimetteriniń kezdesýleri barysynda medısına men týrızm salalaryndaǵy bıznes-yntymaqtastyq máseleleri talqylandy. Vengrııa úkimeti jalpy ótkenge, ortaq baılanystarǵa jáne halyqtar arasyndaǵy júz jyldan artyq yntymaqtastyqqa baılanysty Qazaqstanmen qarym-qatynastyń erekshe mańyzdy ekendigin atap ótti.
Vengrııa pavılony mádenı is-sharalardy da molynan uıymdastyrdy. Olardyń ishindegi Qypshaqtar kúni – venger men qazaq dástúrleriniń ózara baılanystyǵyn, úndestigin aıshyqtady. Kórmeniń sońǵy kúnderinde Vengrııa ekonomıka men densaýlyq saqtaý salasy boıynsha konferensııa ótti. Shara barysynda «elektrondyq pasport», saýyqtyrý týrızmi jáne basqa da tartymdy jobalar talqylandy.
Eki eldiń úkimetteriniń boljamdary boıynsha ekonomıkalyq jáne rýhanı baılanystardy jolǵa qoıýdyń arqasynda syrtqy saýda aınalymy birneshe esege ulǵaıady, qazirdiń ózinde ol 300 mıllıon dollardy quraıdy.
Ashat Raıqul,
«Egemen Qazaqstan»
