Túrikmenstan Prezıdenti Gýrbangýly Berdimuhamedov Qazaqstan Prezıdentin Ashǵabatta ótip jatqan Azııa oıyndarynyń ashylý saltanatyna qurmetti qonaq retinde qatysýǵa arnaıy shaqyrǵan bolatyn. Qazaqstan Prezıdenti О́zbekstandaǵy memlekettik sapary aıaqtalysymen birden Túrikmenstanǵa attandy.
Bóriktiniń namysy bir...
Nursultan Nazarbaevty Gýrbangýly Berdimuhamedov áýejaıdan ózi qarsy aldy. Azııa oıyndarynyń ashylý saltanaty bastalǵanǵa deıin Túrikmenstan Prezıdenti men Qazaqstan Prezıdenti ekijaqty kezdesý ótkizip, elder arasyndaǵy yntymaqtastyq máselelerin talqylady. «Bóriktiniń namysy bir» demekshi, baýyrlas elderdiń halyqaralyq deńgeıdegi osyndaı aýqymdy sharalardy ótkizý kezindegi birin-biri qoldap-qolpashtaýy óte mańyzdy ekendigin áńgimeledi.
Jaýyngerlik óner túrleri boıynsha jabyq keshende ótetin V Azııa oıyndary – sport álemindegi bedeli bıik, baıraqty básekelerdiń biri.
Mundaı halyqaralyq jarys buryn eki jylda bir ótkiziletin, tek 2013 jyldan beri ony 4 jylda bir ret ótkizý týraly sheshim qabyldandy. Sol jyly shara Ońtústik Koreıada ótken bolatyn. Oǵan deıin mundaı Azııa oıyndarynyń jalaýy Vetnam (2005 jyly), Qytaı (2007 jyly), Taıland (2009 jyly) sııaqty Azııanyń alpaýyt elderinde jelbiredi.
«Osyndaı kezde qoldaý kórsetý bizdiń kórshilik, baýyrlastyq paryzymyz dep bilemin. Sizdi jabyq keshende ótetin Azııa oıyndarynyń ashylýymen quttyqtaımyn. Osy shara qarsańynda kóptegen sporttyq nysandar salyndy. Olardyń bári erteńgi kúni halyq ıgiligine qalady. Sonymen qatar, mundaı sharalar Túrikmenstandy, onyń astanasyn jaqyn tanı túsýge, memlekettiń táýelsizdik jyldary ishindegi jetistikterin álemge keńinen pash etýge múmkindik beredi», dedi Qazaqstan Prezıdenti. Sonymen qatar, Memleket basshysy Qazaq eli qysqy Azııa oıyndary, Búkilálemdik stýdentter ýnıversıadasy syndy álemdik deńgeıdegi aýqymdy sporttyq sharalardy laıyqty deńgeıde ótkizgenin atap ótti.
«Taıaýda ǵana EKSPO aıaqtaldy. Bizdiń óńirimizde mundaı oqıǵalardyń ótýi óte mańyzdy. Al búgin Azııa oıyndarynyń ashylýyna zor rızashylyqpen qatysatyn bolamyz. Bizdiń qarym-qatynastarymyzǵa qatysty aıtar bolsam, sizdiń saparyńyzdan keıin kóp sharýa jasaldy. Menińshe, ekonomıkalyq yqtymaqtastyǵymyz artady», dedi Prezıdent.
Nursultan Nazarbaev sóz arasynda О́zbekstanǵa memlekettik saparmen baryp kele jatqandyǵyn, júrgizilgen kelissózder barysynda kóptegen máselelerdiń sheshilgendigin de atap ótti.
Túrikmenstan Prezıdenti óz kezeginde shaqyrý usynysyn qabyl alǵany úshin Elbasyna rızashylyǵyn bildirdi. «Bul bizdiń ortaq merekemiz sanalady. Túrikmender men qazaqtar, tájikter sporttyq óńir sanalady. Menińshe, barshamyzǵa ortaq osynaý merekede salamatty ómir saltyn qalaı qadirlep, halyqty qalaı uıystyrý kerektigin búkil álemge pash etetin bolamyz», dedi óz kezeginde Gýrbangýly Berdimuhamedov. Aıtýynsha, Azııa oıyndaryna álemniń 64 memleketinen sportshylar kelgen. Buǵan qosa, BUU ótinishimen bosqyndar da bul jarysqa arnaıy komanda quryp, synǵa túspek. Osy qadamy arqyly túrikmen halqy óńirdegi turaqtylyqty, qaýipsizdikti saqtaýǵa múddeli ekendigin kórsetýge umtylýda.
«Siz EKSPO-2017 kórmesin ótkizdińiz. Osynaý óńir úshin buryn-sońdy bolmaǵan aýqymdy sharany eń joǵary deńgeıde uıymdastyra aldyńyzdar. Búginde Siz ben biz osyndaı bıik shyńdardy baǵyndyrýdamyz», dedi Túrikmenstan basshysy.
Sport sańlaqtaryna senim zor
Elbasy ekijaqty kezdesýden soń Ashǵabattaǵy jaýyngerlik óner túrleri boıynsha jabyq keshende ótetin V Azııa oıyndaryna kelgen Qazaqstannyń ulttyq quramasymen jáne sportshylar delegasııasymen kezdesti.
Kezdesý barysynda Elbasy ulttyq quramanyń daıyndyǵymen tanysyp, Ashǵabatqa sportshylarymyzdy qoldaý úshin kelgenin aıtty.
«Munda oıyndarǵa qatysyp jatqan elderdiń eń úzdik sportshylary kelip otyr. Bizdiń quramada da kóptegen tanymal chempıondar bar», dedi Nursultan Nazarbaev.
Memleket basshysyna Qazaqstannyń ulttyq quramasynyń kapıtany ári osy oıyndarda taekvondodan óner kórsetetin Nurlan Myrzabaev alǵys bildirdi. «Eń aldymen, Sizge elimizdegi sportty damytýǵa udaıy qoldaý kórsetip otyrǵanyńyz úshin alǵys aıtamyn. Memleketimizdiń álemdik sport arenalaryndaǵy barlyq jetistikterine Sizdiń qosqan úlesińiz zor. Bizder – Qazaqstan ulttyq quramasynyń músheleri Ashǵabatta ótip jatqan oıyndarda tól týymyzdyń bıikte jıi jelbireýi úshin bar kúsh-jigerimizdi salamyz», dedi Qazaqstan quramasynyń kapıtany.
Prezıdent memleket tarapynan elimizde sportpen shuǵyldanyp, salamatty ómir saltyn ustanýǵa barlyq jaǵdaı jasalyp jatqanyn aıtyp, salamatty ult qalyptastyrý úshin otandyq atletterimizdiń jetistikteri mańyzdy ekenin atap ótti.
«Qazaqstannyń barlyq óńirinde túrli sport nysandary salynýda, atletterimiz joǵary deńgeıdegi saıystarǵa qatysýda. Aralaryńyzda jetistikterge jetken áıgili sportshylar bar. Bizdiń jastarymyz – daryndy. Jyl saıyn sportta jańa esimder shyǵyp jatyr. Jalpy, jas jetkinshikter sizderdiń jeńisterińizge qarap, sportpen shuǵyldanýǵa umtylatyn bolady. Ol salamatty ult qalyptastyrýdyń basty sharty bolyp sanalady. Sizder óskeleń urpaqqa úlgi bolýlaryńyz kerek», dedi Elbasy.
Tanymal qazaqstandyq jeńil atlet, Londondaǵy Olımpıada oıyndarynyń chempıony jáne Beıjiń men Rıo-de-Janeırodaǵy Olımpıada oıyndarynyń qola júldegeri Olga Rypakova sóz sóılep, Memleket basshysyna alǵys aıtty. «Jumys kesteńizdiń tyǵyz ekenine qaramastan, bizge qamqorlyq pen qoldaý kórsetip jatqanyńyz úshin Sizge barlyq sportshylarymyzdyń atynan zor alǵysymyzdy aıtýǵa ruqsat etińiz. Siz bizben kezdesip áńgimelesýge, aq tilegińizdi aıtyp, batańyzdy berýge árdaıym ýaqyt tabasyz. Biz ózimizdi tek jaqsy qyrymyzdan tanytyp, Sizdi jáne barsha qazaqstandyq jankúıerlerdi qýantýǵa barymyzdy salamyz», dedi Olga Rypakova.
Sońynda Memleket basshysy Qazaqstandaǵy mıllıondaǵan jankúıerler sportshylarymyzdyń tabysty óner kórsetetinine senimdi ekenin aıtyp, olardyń jarysty sátti bastap, aıqyn jeńiske jetýine tilektestigin bildirdi.
Dınara BITIK,
«Egemen Qazaqstan» –
Ashǵabattan
Sýretter Prezıdenttiń baspasóz qyzmetinen alyndy
