Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýy men «Bolashaqqa baǵdar: rýhanı jańǵyrý» baǵdarlamalyq maqalasyndaǵy mindetterdi júzege asyrý boıynsha munaıly aımaqta qolǵa alynǵan ıgi isterdiń qatary kóp. Buǵan Premer-Mınıstr Baqytjan Saǵyntaev Atyraý oblysyna jumys sapary kezinde kóz jetkizdi.
Bolashaq munaıshylardyń bilim ordasy
Elbasy Joldaýynda adamı kapıtaldy damytý, bilim berýdiń kókjıegin keńeıtý máselesine nazar aýdarylǵan. Osy rette Atyraýdaǵy APEC Petro Technic Joǵary tehnıkalyq kolledjindegi munaı-gaz salasy mamandaryn oqytýdyń qazirgi zamanǵy úlgisin aıryqsha ataýǵa bolady. Ashylǵanyna bes jyl bolǵan oqý ornynda jastardyń alańsyz bilim alýyna qajetti barlyq jaǵdaı bar. Premer-Mınıstrdiń jumys sapary osy bilim ordasynan bastaldy. Stýdent jastarmen kezdesken Baqytjan Saǵyntaev munaı-gaz salasyna kadr daıyndaý, túlekterdiń básekege qabilettiligin arttyrý, bolashaq mamandyqtary úshin daǵdylar men biliktilikter qalyptastyrý, dýaldy oqytýdyń erekshelikteri men kásibı quzyretterdi keńeıtý boıynsha jas mamandarǵa jaǵdaı jasaý máselelerine toqtaldy. Bilim jáne ǵylym mınıstri Erlan Saǵadıev kezdesýde aıtylǵan jaıttar boıynsha túsinikteme berip, jastarǵa zamanǵa saı bilim alýdyń qajettiligin atap aıtty.
Tehnologııalyq jańǵyrtý tıimdiligi
Elbasy Joldaýy aıasynda munaı-gaz salasyndaǵy kásiporyndardyń tehnologııalyq jańǵyrtylýy Premer-Mınıstrdiń qatysýymen ótken jıynnyń kún tártibine qoıyldy. «Teńizshevroıl» birlesken kásipornynda bolǵan Úkimet basshysy Atyraý, Mańǵystaý, Aqtóbe, Batys Qazaqstan, Qyzylorda oblystaryndaǵy iri munaı kompanııalarynyń basshylarymen kezdesti.
Aldymen Atyraý oblysynyń áleýmettik-ekonomıkalyq jaǵdaıy týraly habarlama jasaǵan aımaq basshysy Nurlan Noǵaev ekonomıkany ártaraptandyrý boıynsha qolǵa alynǵan sharalardy da nazardan tys qaldyrmady. Búginde munaıly óńirde 600-den astam ónerkásip kásiporny jumys isteıdi. «Qazaqstandyq mazmunnyń úlesin kóbeıtý týraly sheteldik kompanııalarmen kelisimder jasaldy. Alaıda qural-jabdyqtardy jetkizý men ornalastyrýda jergilikti jerdiń múmkindigi áli de tolyq paıdalanylmaı keledi», – dedi oblys ákimi.
Energetıka mınıstri Qanat Bozymbaev munaı-gaz salasyndaǵy kásiporyndardy tehnologııalyq jańǵyrtý týraly baıandasa, Aqparat jáne kommýnıkasııalar mınıstri Dáýren Abaev «Sıfrly Qazaqstan» baǵdarlamasynyń sheńberindegi is-sharalar jaıyna toqtaldy. «QazMunaıGaz» AQ-tyń jumysynan kásiporyn basshysy Saýat Myńbaev habardar etti. «SNPS – Aqtóbemunaıgaz», «Petro Qazaqstan Qumkól Resorsız», «Teńizshevroıl», basqa da kompanııalardaǵy tehnologııalyq jańǵyrtýlar da áńgime ózegi boldy.
Jıyndy qorytyndylaǵan Baqytjan Saǵyntaev munaı-gaz salasy mamandarynyń biliktiligin arttyrý, jumyssyzdyqtyń aldyn alý, jobalardaǵy jergilikti qamtýdy kóbeıtý boıynsha kásiporyn basshylaryna mindetter júktedi.
Atyraýlyq kásipkerlerdiń bıznesi berekeli
Atyraýdaǵy «Atameken» UQP О́ńirlik keńesiniń músheleri de Úkimet basshysymen kezdesý múmkindigine ıe boldy. Shaǵyn jáne orta bıznesti damytý, kásipkerlerdi elimizdiń munaı-gaz salasyn sıfrlandyrýǵa tartý máseleleri aıtylǵan májiliste munaıly óńirde shaǵyn ındýstrııalyq aımaqtar qurý, aýyl sharýashylyǵy salasy bıznesin nesıelendirý jaıy da nazardan tys qalmady.
Premer-Mınıstr Elbasy tapsyrmasyna sáıkes sıfrly tehnologııalardy ekonomıkanyń barlyq salalaryna engizý kerektigin atap ótti. Kásipkerlerge sáıkes yntalandyrý júıesin qurý, normatıvtik bazany jetildirý, kásiporyndardy sıfrly transformasııalaý úshin shyǵyndardy azaıtý, sıfrly jobalarǵa ınvestısııalar tartý úshin qolaıly jaǵdaı jasaý boıynsha jumys júrgizilýde. Atyraý oblysynyń kásipkerleri bul baǵytta úlken múmkindikke ıe, sebebi munaı-gaz salasy Indýstrııa 4.0 elementterin engizý úshin óte qolaıly. Baqytjan Saǵyntaev Úkimettiń bıznesti qoldaý, jeńildikti nesıeleý túrindegi quraldary bar AО́K-ti damytý men ónimdi jumyspen qamtý jáne jappaı kásipkerlikti damytý aıasyndaǵy jumystar jalǵasyp jatqanynan habardar etti.
Investısııalyq jobanyń ıgiligi kóp
Qashaǵan ken ornynyń nysandarynda munaı-gaz salasyndaǵy óndiris qýattylyǵyn arttyrý boıynsha tapsyrmalardyń oryndalý barysy da Úkimet basshysyna baıandaldy. Jasandy D araly men «Bolashaq» zaýytyn aralaǵan Baqytjan Saǵyntaev álemdegi iri kómirsýtekti nysandardyń biri jáne elimizdegi eń iri halyqaralyq ınvestısııalyq joba retinde Qashaǵannyń mańyzy zor ekenin atap aıtty. Qazir munda aı saıyn 650 myń tonnaǵa deıin munaı óndiriledi. Al «Bolashaq» zaýyty munaıdy qaıta óńdeýmen, ony saqtaýmen jáne eksportqa jóneltýmen, gazdy daıyndaýmen, suıyltylǵan gazdy otyn retinde alýmen, kúkirt óndirý ári ony saqtaýmen, qaldyq gazdy tazartýmen jáne qoldanystaǵy jelige qosylý núktesine deıin jetkizýmen aınalysady. Jaqynda Atyraýda taǵy bir joba bastaý alady. Táýligine 4500 tonna túıirshiktelgen kúkirt shyǵaratyn zaýyttyń óńir ekonomıkasyna qosatyn úlesi kóp bolmaq.
«Nurly jer» baǵdarlamasy: qurylysta qarqyn bar
Úkimet basshysy jumys saparynda «Nurly jer» baǵdarlamasy boıynsha salynǵan kóp páterli turǵyn úılerdi kórýge de ýaqyt tapty. Oblys ortalyǵyndaǵy «Nursaıa» shaǵyn aýdanyndaǵy «Tulpar-2» turǵyn úı kesheni memlekettik baǵdarlama sheńberinde boı kótergen. Bıyl Atyraýda 370 sharshy metr turǵyn úı paıdalanýǵa berildi, bul ótken jylmen salystyrǵanda 20 paıyzǵa artyq kórsetkish. Qazir 37 kóp qabatty turǵyn úı qurylysy júrip jatyr. Qurylys jumystarymen tanysqan Baqytjan Saǵyntaev: «Eń aldymen áleýmettik nysandarǵa, mektep, balabaqshalardyń salynýyna, sapaly turǵyzylýyna mańyz berilýi kerek» – dedi.
Baqytgúl BABASh,
«Egemen Qazaqstan»
ATYRAÝ
Sýret Premer-Mınıstrdiń baspasóz qyzmetinen alyndy
