Kınokompanııanyń bas prodıýseri Ernar Malıkovtiń aıtýynsha, ashtyqtyń saldarynan qazaq halqynyń 60 paıyzǵa jýyǵy qyrylyp, 1,5 mıllıonnan astam adam týǵan jerin tastap, shekara asýǵa májbúr bolǵan. Tarıhı derekterdi alǵa tartqan prodıýserdiń málimetinshe, 1911 jyldary Qazaqstandaǵy jergilikti ult sany 8,5-9 mln bolǵan. Qazaq halqy san jaǵynan túrki tildes halyqtardyń ishinde Osman túrikterinen keıin ekinshi oryn ıelengen. Al 1939 jylǵy derekterge qaraǵanda, buryn-sońdy bolmaǵan zulmattan nebári 2,4 mln qazaq qana aman qalǵan.
Sondaı-aq fılm ssenarııiniń avtory ári rejısseri, eýropalyq jáne halyqaralyq áıel-fılmmeıkerler qaýymdastyǵynyń múshesi Marına Qonarova ulttyq qundylyqtardy qurmetteýge, adamgershilik, aýyzbirshilik, adamzatty súıý sekildi izgilik ıdeıasyn dáripteýge de erekshe mán berilgenin aıtty.
Fılmniń jobasyn ol osydan bes jyl buryn jazǵan. Osy ýaqytqa deıin oraıly sátin kútip jatqan jobaǵa Eýropa kıno qory tek bıyl ǵana qoldaý bildirip, fılm bıýdjetiniń teń jartysyn tólep berýge usynys jasaǵannan keıin túsirý toby iske kirisken.
Fılmniń jarty qarajatyn tabý úshin bas prodıýser jeke ınvestorlar men bul taqyrypqa beıjaı qaraı almaıtyn janashyrlardyń qoldaýyna súıenetinin jetkizdi. Túsirilim jumysy qarasha aıynda bastalyp, 2018 jyldyń aqpan aıynda aıaqtalady dep josparlanyp otyr. 2018 jyldyń kúzinde «Asharshylyq» fılmi álemdik prokatqa jol tartpaq.
Aıgúl AHANBAIQYZY,
«Egemen Qazaqstan»
ALMATY
