Naqtyraq aıtqanda, Esil aýdanyndaǵy №7 agrotehnıkalyq kolledj stýdentteri dýaldy oqytý júıesiniń arqasynda bilimderin tolyqtyryp qana qoımaı, sonymen qatar tikeleı óndiriste óz biliktilikterin de arttyra aldy.
Byltyr osyndaı óndiristik tájirıbeden ótýdiń arqasynda stýdentterdiń 1,5 mıllıon teńge tabys tapqandyǵy olardy eńbekke yńtalandyra túsetini aıtpasa da túsinikti. Jalpy, atalǵan kolledj 2015 jyldan beri «Tamaqtanýdy uıymdastyrý» mamandyǵy boıynsha dýaldy oqytýdy qolǵa alǵan bolatyn. Al 2016 jyly Aqmola oblysynyń kásipkerler palatasynda tirkelgen. Sodan atalǵan mamandyq boıynsha úshjaqty 39 kelisimshart túzilip, dýaldy oqytý júzege asyryla bastady. Budan basqa, jyl saıyn kóktemgi egis naýqany men kúzgi jıyn-terimde sharýa qojalyqtary stýdentterdi «Fermerlik sharýashylyq», «Dánekerleý isi» mamandyqtary boıynsha kásibı tájirıbeden ótýge qabyldap keledi. Ásirese tájirıbeden ótýshiler ishinde traktorshylar, dánekerleýshiler, esepshiler, aspazdar úlken suranysqa ıe. Kolledj dırektorynyń oqý-óndiristik jumys jónindegi orynbasary Natalıa Boıko oqytý prosesiniń kestesi stýdentterdi tájirıbeden ótkizýge qabyldaıtyn áriptesterdiń jumys ereksheligine qaraı túziletiniń erekshe atap ketti.
Stýdentterdiń kásiptik tájirıbeden ótýi úshin qajetti kásiporyndardyń sany qazirgi kezde 40 jetse, osynshama baza qalyptasqandyǵyn erekshe ataı ketken jón. N.Boıko bul rette tańdaý quqy zamanaýı materıaldyq-tehnıkalyq bazasy bar, bilikti mamandary jetkilikti jáne uzaq ýaqyttan beri ózara tıimdi negizde stýdentterdiń tájirıbeden ótýi úshin óz bazalaryn usynyp kele jatqan kásiporyndarǵa beriletindigin alǵa tartady. Osyndaı tolyqqandy kásibı tájirıbeden ótýdiń arqasynda oqýyn bitirgen stýdentter tez jumysqa alynyp jatady. Memlekettik zeınetaqy tóleý ortalyǵynyń taratqan málimetine sensek, 2016 jyldan bastap kolledj túlekteriniń zeınetaqy esep shottarynda qarjy jınala bastaǵan.
Asqar TURAPBAIULY,
«Egemen Qazaqstan»
Aqmola oblysy
