Zarına Dıas halyqaralyq Japan Open týrnıriniń je­ńimpazy atandy

Zarına Dıas (álemniń 100-raketkasy) jarys­ty týrnırdiń irik­teý kezeńinde Taıland eliniń ten­nısshisi Lýksıka Kýmhýmmen (155) kezdesip, 2:1 nátıjesimen jeńis­ke jetti. Birinshi partııada Lýk­sıka 6:1 esebimen basym tússe, ekinshi jáne úshinshi sette Za­rına jeńisti julyp aldy. Negiz­gi kezeńniń birinshi aınalymyn­da Dıas dál osyndaı eseppen ja­po­nııalyq tennısshi Mısakı Doıdi (95) jeńdi.

Elimizdiń eks-birinshi raketkasy Zarına Dıas 1/8 fınalda qytaılyq tennısshi Chjan Shýaı­dy (28) eki sette 6:4, 6:2 ese­bi­men jeńip, týrnırdiń kelesi kezeńine shyqty. Shırek fınalda eki qazaqstandyq tennısshi qyz Zarına Dıas pen elimizdiń bi­rin­shi, álemniń 52-shi raketkasy Iýlııa Pýtınseva bir-birine qarsy oınady. Bul jupta Zarınanyń me­reıi ústem boldy. Birinshi sette  Pý­tınseva 6:4 esebimen jeńiske jet­se, qalǵan eki set (6:1, 6:3) Dıas­tyń paıdasyna sheshildi. Aıta keteıik, Zarına Dıas pen Iýlııa Pýtınseva ózara tuńǵysh ret kúsh synasty.

Jartylaı fınaldyq básekeni Zarına amerı­kalyq Krıstına Mak­heılǵa (62) qarsy ótkizip, úsh­ setke sozylǵan oıynda jeńiske jetti. Al­ǵash­qy partııada 6:4 ese­bimen utyp, ekinshi partııada 0:6 esebimen utylǵan otandasymyz taǵy da qaısarlyq tanytyp úshin­shi partııada 6:3 ese­bimen jeńiske jetti.

Halyqaralyq týrnırdiń fınalynda otandasymyz kort ıesi japonııalyq Mıı Katoǵa (171) qarsy oıyn ótkizip, bir saǵat 19 mı­­nýtqa so­zyl­ǵan matchta 6:2, 7:5 esebimen basym tústi. 23 jastaǵy Za­rına qazaq tennısshileri ara­syn­da WTA tujyrymyna enetin Japan Open týr­nıriniń tuńǵysh ret jeńimpazy atandy. Eske sala ketsek, Zarına 2014 jyly Japan Open jarysynyń fınalyna shyǵyp, avstralııalyq Samanta Stosýrdan jeńilgen edi.

«Egemen-aqparat»