Saran qalasynyń irgesinde resmı túrde alǵash ret uıymdastyrylǵan sharaǵa Qaraǵandy oblysynyń ákimi Erlan Qoshanov pen «Qazposhta» AQ basqarma tóraǵasy Sáken Sársenov qatysty.
«Biz shilde aıynda Aqparat jáne kommýnıkasııalar mınıstri Dáýren Abaevtyń qatysýymen elimizdegi iri basylym basshylarymen kezdesý ótkizgen edik. Sol jıynda gazet taralymynyń 99%-yn baspahanadan shyqqan kúni aýdan, qalalarǵa, al 1%-yn kelesi kúni jetkizý basym maqsatymyz ekeni aıtylǵan. Osyndaı oımen oblys ortalyǵynan tys, aýdandyq baılanys toraptary men bólimshelerine poshta tasymaldaý jıiligin arttyrdyq. Búginde basylymdar Qazposhtanyń óndiristik nysandarynda táýlik ishinde taratylýda. Máselen, ótken jyldyń basynda gazettiń tek 39%-y shyqqan kúni tasymaldanǵan bolsa, qazir kompanııa bul kórsetkishti 93,2%-ǵa deıin jetkizdi. Biraq, qolaısyz aýa raıy kezderinde jáne jol jaǵdaıy qıyn shalǵaıdaǵy eldi mekenderge merzimdi basylymdardy aparý kúrdeli kúıinde qalyp otyr edi. Qalaı desek te, jyl basynda gazettiń 12 paıyzy shyqqan kúni jetkizilse, qazir bul kórsetkish 48 paıyzdy quraıdy. Endigi jerde máseleni drondardy iske qosý arqyly sheshýdemiz», deıdi «Qazposhta» AQ basqarma tóraǵasy S.Sársenov.
Negizinen hat-habardy ushqyshsyz apparattyń kómegimen tasymaldaý osy kezderi resmı túrde jarııalanǵanymen, búginge deıin elimizdiń 4 oblysyndaǵy 9 aýdanda 30 baǵyt boıynsha synama ushyrý ótkizilipti. Bas-aıaǵy 9 myń shaqyrymnan asa ushqan drondar 500 kg merzimdi basylymdar men hat-habarlardy jedel jetkizgen. Al kompanııanyń esebine súıensek, Almaty oblysyndaǵy Jambyl aýdanyna qarasty Uzynaǵash–Degeres aýyly arasynda (155 km) hat-habardy avtokólikpen tasymaldaýǵa shamamen 4 saǵat ýaqyt jumsalsa, bul aralyqty dron bar-joǵy 40 mınýtta erkin eńseredi eken. Sol sııaqty Ońtústik Qazaqstan oblysyndaǵy Shaıan–Aǵybet baǵytyndaǵy aralyq qatynas shyǵyny men ýaqyty da eki esege qysqarǵan. Mundaı mysaldardy kóptep keltirýge bolady. Eń bastysy – únemdi ári qolaıly.
Bul kúni poshta mamandary Saran qalasynan Dýbovka aýylyna salmaǵy 2 kılogrammdy quraıtyn gazetti dron arqyly attandyrdy. Avtomatty rejimde belgilengen baǵytpen ushyrylǵan apparat 10 mınýtta (osy aralyqty avtokólikpen 30 mınýtta júrip ótedi eken) mejeli orynǵa jetip, poshta salynǵan paketti tastaǵan soń, keri oraldy. Al hat-habar salynǵan paketti aýyl poshtashysy óńdep, ádettegi tártippen taratady. Dron tek qana, gazetter men jýrnaldar ǵana emes, sondaı-aq salmaǵy 2 kılogrammǵa deıingi shaǵyn sálemdemelerdi de jetkizýge qabiletti.
Shara aıasynda sóz alǵan óńir jetekshisi Erlan Qoshanov mundaı joba aımaqtaǵy ahýaldy Memleket basshysy mindettegen tapsyrmalardy oryndaý maqsatynda júzege asyrylyp jatqanyn aıtady.
«Elbasymyz jýyrda ǵana Qazaqstan halqy sandyq tehnologııanyń qoldanys aıasyn meılinshe keńeıtý qajettigin naqtylap, tıisti deńgeıde tapsyrmalar júktegeni belgili. Respýblıka boıynsha bizdiń oblystyń aýmaǵy óte aýqymdy ekenin bilesizder. Al endi búgin dron qyzmetine júgine otyryp, hat-habar, gazet-jýrnal tasymaldaý qyzmetin jandandyryp jatqanymyz der kezinde qolǵa alynǵan sharýa boldy dep esepteımin. «Qazposhta» AQ-men birlese otyryp, óńirde atqaryp jatqan ózge de jospar-jobalarymyzdyń ıgiligin el kóredi degen senemin», deıdi ol.
Mamandardyń pikirinshe, bul tehnologııa Qazposhtanyń hat-habarlardy tasýǵa jumsalatyn shyǵynyn aıtarlyqtaı qystartýǵa múmkindik beredi jáne kýrerlerdiń de ýaqytyn únemdeýge sep. Aıtalyq, avtokólik jolsyz jerlermen jarty kúnde jetetin aýyldyq bólimshege dron bar bolǵany bir saǵatta ushyp barady. Taǵy bir atap óterlik másele – búginde qyzmet kórsetýshi kompanııa drondy ushyrýǵa ruqsat qujattaryn kelisip, jetekshilik etetin vedomstvonyń maquldaýyna ıe bolǵan jáne barlyq baǵyttar boıynsha ushý kestesi jasalǵan.
Al ushqyshsyz ushý apparattaryn jasap shyǵarýmen aınalysatyn kompanııa dırektory Alekseı Kımniń aıtýynsha, dron 100 kılometr qashyqtyqty úzilissiz erkin eńsere alady. Bir jarym saǵatta qýat alyp úlgeretin batareıalary 2-3 saǵatqa jetedi. Al dronnyń dittegen jerge jetýi úshin borandy kún men jeldiń qýaty sekýndyna 10-12 metrden aspasa bolǵany.
Jalpy, buryndary aýyl turǵyndaryna merzimdi basylymdy kúnbe-kún jetkizý úshin qosymsha kólik satyp alý nemese jańa qyzmetkerler jaldaý josparlanǵan bolsa, endigi jerde Qazoshta bul qarajatty bólimshelerdi jańǵyrtý men júıelerdi jańartýǵa jumsamaq. Tipti, drondardy satyp alýǵa da qarjy shyǵyndalmaǵan. Basqarma tóraǵasynyń túsindirýinshe, Qazposhta servıstik model boıynsha jumys jasaý negizinde kórsetilgen qyzmetter úshin ǵana aqy tóleıdi.
«Keı kezderi bizge qanshama janarmaı men ýaqytty jumsap, avtomobıl jóneltkenge qaraǵanda, birneshe kılogram salmaqtaǵy drondardy 5-6 márte ushyrǵan áldeqaıda arzanǵa túsedi», deıdi S.Sársenov.
Nurlybek DOSYBAI,
«Egemen Qazaqstan»
