Aýdan jastary qolǵabys etti
«Jas Otan» jastar qanatynyń «Ardagerlerdi ardaqtaıyq» jobasy Mańǵystaý aýdanynda da sátti júzege asyp keledi. Jasotandyq jastar tek Shetpe selosynda ǵana emes, sonymen qatar, Qyzan, Ushtaǵan, Jyńǵyldy aýyldarynda da belsendilik tanytýda.
Osyndaı ıgi is shetpelik tyl ardageri, jalǵyzbasty Spanǵalı Baıdýllaevtyń úıinde jalǵasyn tapty. Sharanyń maqsaty –keler urpaqqa úlgi-ónege kórsetken ardagerlerdi qurmettep, olardyń erlikterin dáripteý boldy. Atalmysh sharaǵa qatysqan Shetpedegi Alshyn Meńdalıev atyndaǵy orta mekteptiń belsendi jasotandyqtary men eriktiler toby Spanǵalı atanyń úıine baryp, irgeli is tyndyryp qaıtty. Jastar Spanǵalı aqsaqaldyń úı-jaıyn, qoralaryn tazartty. Kezdesý barysynda jastar ardagermen suhbat júrgizip, kóńilin kóterý úshin konserttik baǵdarlamalar uıymdastyrdy. Án aıtyp, kúı shertip, qyzdar myń buralyp bılep berdi. Biz de óz tarapymyzdan elimizdiń barlyq jastaryn ıgi istiń basynda júrip, qarııalarǵa qurmet tanytýda belsendi bolýǵa shaqyramyz.
Allabergen QONARBAEV,
jastar qanatynyń tóraǵasy
Mańǵystaý oblysy,
Mańǵystaý aýdany
Balabaqshada barlyq jaǵdaı bar
Osydan biraz buryn Aqmola oblysynyń Býrabaı aýdanynda 125 oryndyq balabaqsha ashylyp, el kútken ıgi shara júzege asqan bolatyn. Bul «Balapan» atty jarty ǵasyrǵa jýyq buryn salynǵan ǵımaratqa ótken jyly kúrdeli jóndeý jumystary júrgizilip, balabaqsha retinde qaıta jasaqtaldy. Mekeme basshysynyń aıtýy boıynsha, jobanyń quny 70 mıllıon teńgeni qurasa, onyń 60 mıllıon teńgesi «Damý» kəsipkerlikti damytý qory arqyly bólingen.
«Qazirgi zamanǵa saı jabdyqtalǵan balabaqshada balalardyń mektepke deıingi bilim men tərbıe alýyna barlyq jaǵdaı jasalynǵan. Osy maqsatta 30 mıllıon teńgeniń qural-jabdyqtary satyp alynyp, ornatyldy. Nysanda 4 oıyn alańy, 4 jatyn bólme, 4 sanıtarlyq jeli, sport jəne mýzyka zaldary bar. Ústimizdegi jyly ǵımarattyń káriz, sý jəne jylý júıelerin jańartý kózdelip otyr», deı kele mekeme basshysy, aýyl turǵyndary atynan qamqorlyq kórsetken el azamattaryna rızashylyǵyn bildirdi.
Aslan OSPANOV
Aqmola oblysy
Qaraýsyz qalǵan aqyn zıraty
«Osyndaı jaısyz habardy estip, onda arnaıy bardym. Kúre joldan kesenege aparatyn jol shurq tesik, eki jıegin belýardan shóp basyp, molanyń ıesiz ekenin áp degennen kórsetti. Jete beristegi kópirden kóktemde sý asyp ketse kerek, búlinip qalǵan. Kesene qorshaýynan sál ári áldekim shlagbaým qoıypty. Onysy bir jaǵyna qısaıyp, osy mańnyń sıqyn alyp tur. Qorshaý ishindegi jaǵdaı da tup-týra jol ústindegideı. Sonaý jyldary mola aldyna gúl otyrǵyzatyn astaýlar qoıylǵanyn biletinbiz. Olardyń da synǵany synyp, synbaǵanynyń boıaýy ońyp suryqsyzdanypty. Munda da shóp belýardan. Neshe jyl shalǵy tımegeni anyq. Oblys basshylary at basyn burmaǵany osydan-aq kórindi. Kóńilimiz túsip, Sara apamyzdyń árýaǵyna arnap quran oqydyq. Bizdiń qoldan keler osy ǵana ǵoı.
Qadirjan MUSAǴULOV
Almaty
Malaı eliniń matasy
Osy jasqa deıin túrli syılyqtar da, sálemdemeler de alyp júrmin. Barlyǵy da shyn kóńilden berilgen týystardyń, dostardyń usynǵan nárseleri bolǵannan keıin kóp mán bermeıdi ekenmin. Bıyl ǵana Malaızııadan Darııanyń berip jibergen kóılektik matasy kózge erekshe ystyq kórindi.
Sál sheginis jasaıtyn bolsam, Darııa – qyzym Aıymzadanyń qurbysy, jumystasy. Darııa óziniń jigerliligi, izdenimpazdyǵy arqasynda Astanadaǵy Qazaq radıosynda 2 jyl qyzmet atqardy. О́te baýyrmal, qaıyrymdy. Birde qyzym habarlasyp, «Apa, Darııaǵa Jetisaıdan Abzal degen jigit quda túskeli jatyr. Kúzde jumys babymen Malaızııaǵa ketedi, sol jaqta elshilikte isteıdi», dedi.
Búginde Abzal men Darııa sol jaqta turyp jatyr. Kishkentaıly bolǵan, ata-analary da baryp turady. Jaqynda elge kelgen qyzymnan Darııa sálemdemege malaı eliniń kóılektik matasyn berip jiberipti. Bireýlerge jaı mata bolýy múmkin, men úshin salt-dástúrdi boıyna sińirgen qarapaıym qazaq qyzynyń elge degen saǵynyshy, ultty uıystyrar tárbıesi jatqandaı. Qazaqta «Syıǵa – syı, syraǵa – bal» – degen naqyl sóz bar. Ázirge Abzal men Darııaǵa, kishkentaı Tıaraǵa elimizdiń bas gazeti arqyly ystyq sálemimdi joldap, issaparlaryń sátti aıaqtalyp, týǵan jerge aman-esen oralyńdar degen tilektemin.
Gúljan TOQMÝRZINA,
muǵalim
Atyraý oblysy,
Qyzylqoǵa aýdany,
Qarabaý aýyly
Lımonymyz ónim berse eken
Eki jyl buryn Túrkistan qalasyna qarasty Iassy aýyldyq okrýgindegi «Qanjigit» sharýa qojalyǵynyń jylyjaıynda lımon talshyǵy otyrǵyzylypty degen habardy estip eleń ete qalǵanbyz.
2015 jyldyń jeltoqsan aıynda egilgen sıtrýsty kóshetter osy jyldyń kúzinde ónim beredi eken. Osyndaı jańalyqpen bólisken «Qanjigit» ShQ agronomy B.Momynov «Lımon 40-60 jyl jasaıtyn ósimdik. Alǵashqy jemisin 2 nemese 3 jylda beredi. О́ıtkeni bul baıaý ósedi. Sondyqtan lımon ósirýde asqan shydamdylyq qajet. Keıde osyndaı kútimmen banan, kıvı sııaqty tropıkalyq jemisterdi de júreksinbeı jylyjaılarda ósirýge bolatyn sııaqty», dep jańashyl oılaryn jetkizgen bolatyn. B.Momynov lımon kóshetterine kútim jasaýdy jaqsy meńgergen. Arnaıy kýrstan dáris alǵan agronom 3 gektar jerge egilgen lımon aǵashynan aldaǵy ýaqytta mol ónim alýdy josparlap otyrǵanyn aıtady.
Aıta keterligi, «Qanjigit» ShQ jylyjaı kásibin bastaǵanyna bes jyldan asqan. 3 gektar jerge qyzanaq pen qııar egip otyrǵan sharýa qojalyq ókiliniń aıtýynsha jylyjaı aýmaǵyn keńeıtip, ónim túrlerin kóbeıtpek nıette. Búginde munda 30-ǵa jýyq aýyl turǵyndary jumyspen qamtylyp otyr.
Aman BOLSYN
Ońtústik Qazaqstan oblysy
