Bul jolǵy Elbasy kitaphanasynda ótken semınar-trenıng «Qazaqstan joly: Máńgilik el» baǵdarlamasy boıynsha jalǵasyn tapty. Almaty qalasyndaǵy irgeli bilim ordalarynyń biri Qazaq ulttyq agrarlyq ýnıversıteti men Qorqyt ata atyndaǵy Qyzylorda memlekettik ýnıversıteti stýdentteri Otanymyzdyń ótkeni men búginin jarqyn bolashaǵyn semınar-trenıngte jan-jaqty tanyp bilýge múmkindik aldy. Osy ýaqytqa deıin «Qazaqstan joly: Máńgilik el» kýrsy boıynsha 947 adam bilimin jetildirgen eken.
Semınar aıasynda kitaphananyń ǵylymı qyzmetkerleri, sonymen qatar, professor Ǵazız Telebaev pen tarıh ǵylymdarynyń doktory Saǵyntaı Berdaǵulova alýan túrli taqyryptarda dárister júrgizdi. Al trenıng bóliminde túrli sabaqtar men tapsyrmalardan, oı-talqy men pikirsaıystardan quralǵan dóńgelek ústel uıymdastyryldy.
Ekinshi kúni Qazaqstan Jastary kongresi respýblıkalyq uıymy baspasóz qyzmetiniń jetekshisi Aıda Syzdyqova Prezıdenttiń rýhanı jańǵyrý jónindegi bastamasy eldiń kóńilinen shyqqanyn, ásirese keıingi urpaqty serpiltkenin aıtyp, qazaq jurtyn tórtkúl dúnıege tanytqan EKSPO kórmesi kezinde 5 myńǵa jýyq eriktilerdiń jurtshylyqqa qyzmet etkeni týraly jan-jaqty baıandady. Bul táýelsiz el jastary qandaı jumysty tapsyrsa da múltiksiz alyp shyǵatynyn kórsetti degen ol endi Jer-Ananyń taǵdyryn oılaý, bolashaqty baǵdarlaý ár jas óz maqsatyn iske asyrý jolynda qımyl-qareket jasap, sol arqyly júrer jolyńdy tańdap, baǵytyńdy belgilep alý kerektigin de eske saldy. Endigi jerde erikti jastardy qalyptastyrý, olardyń azamattyq belsendiligin arttyrý, tájirıbe jınaqtaý, aldyńǵy tolqynǵa izet kórsete otyryp, izbasarlarǵa qamqorlyq tanytý isin jolǵa qoıý, sóıtip «Kemel el» baǵdarlamasy arqyly kósh-
basshylar sanyn arttyrý jaıyn da tiline tıek etti. EKSPO kezinde el jastary eldik iske qashanda daıyn ekenin tanytyp qana qoıǵan joq, ózderiniń bilimimen de, iskerligimen de, uıymdastyrýshylyq qabiletimen de tanyla bildi, dedi A.Syzdyqova.
Budan keıin Almaty men Qyzylordadan kelgen stýdentter alǵan bilimderi týraly baıandap, ózderiniń ónerlerin kórsetti. Ásirese uly kompozıtor Nurǵısa Tilendıevtiń «Álqıssa» kúıin Qazaq ulttyq agrarlyq ýnıversıtetiniń 3-kýrs stýdenti Ázız Qadyrqanuly kelistire oryndap, jurttyń iltıpatyna bólendi.
Jastarǵa arnaıy sertıfıkattar men baǵaly syılyqtardy Qazaqstan Respýblıkasynyń Tuńǵysh Prezıdenti – Elbasy kitaphanasy dırektorynyń birinshi orynbasary Ámirhan Rahymjanov tapsyryp, Máńgilik el jastaryn Elbasy alǵa qoıyp otyrǵan ıdeıa aıasynda baýlyp, rýhanı jetildirý isi alda da jalǵasa beretinin aıta kelip, buryn qazaq jastary kóp jaǵdaıda alǵa umtylýǵa talpyna qoımasa, qazir odan arylyp, álemdik úrdistiń kez kelgen jaqsy salalaryn ózderiniń oıy men boıyna darytyp qana qoımaı, jurt aldynda kórsetýge talpyna bastaǵanyn jetistik dep atady.
Súleımen MÁMET,
«Egemen Qazaqstan»
