«…Qazaqstandyq tarap ústimizdegi jylǵy 19 qyrkúıekte Almaty qalasynda Qazaqstan Respýblıkasynyń Prezıdenti N.Á.Nazarbaevtyń Qyrǵyz Respýblıkasynyń prezıdenttigine kandıdattardyń birimen bolǵan kezdesýine oraı Qyrǵyz Respýblıkasynyń Syrtqy ister mınıstrliginiń áreketine qatty tańdanys bildiredi.
Memleket basshysynyń ártúrli elderdiń kórnekti saıası qaıratkerlerimen jáne saıası partııalardyń basshylarymen olardyń ótinishi boıynsha kezdesýleri turaqty túrde ótkizilip turady jáne halyqaralyq tájirıbege tolyq sáıkes keledi. Bul rette mundaı is-sharalar ashyq, transparentti sıpatta ótip, buqaralyq aqparat quraldarynda keńinen jarııalanady.
Máselen, ústimizdegi jylǵy 14 tamyzda Astanada Memleket basshysy Qyrǵyz Respýblıkasynyń prezıdenttigine kandıdattardyń biri, burynǵy premer-mınıstr S. Jeenbekovpen osyndaı ekijaqty kezdesý ótkizdi.
Oǵan qosa, Memleket basshysynyń tujyrymdaryn Qyrǵyz Respýblıkasy Syrtqy ister mınıstrliginiń burys túsindirýine túsinbestik bildiremiz. Atalǵan kezdesýler barysynda Qazaqstan Respýblıkasynyń Prezıdenti Qyrǵyz Respýblıkasy prezıdenttigine qandaı da bir naqty úmitkerdiń paıdasyna qoldaý bildirgen joq. Onyń ústine, Astana jáne Almaty qalalarynda qyrǵyz ókilderimen kelissózder barysynda Memleket basshysy baýyrlas qyrǵyz halqy senim bildirip, saılaıtyn Qyrǵyz Respýblıkasynyń kez kelgen Prezıdentimen tıimdi ózara is-qımyl jasaýǵa daıyn ekenin aıtty.
Osyǵan baılanysty Qyrǵyz Respýblıkasynyń ishki isine aralasýǵa jáne el halqynyń tańdaýyna yqpal etý áreketine qatysty qyrǵyz tarapynyń oıdan shyǵarylǵan tujyrymdaryn tabandy túrde joqqa shyǵaramyz.
Qyrǵyz Respýblıkasy Syrtqy ister mınıstrliginiń mundaı áreketi qazaqstandyq tarap adaldyq tanytatyn, eki halyq arasyndaǵy dástúrli baýyrlastyq qatynastarǵa jáne Qazaqstan Respýblıkasy men Qyrǵyz Respýblıkasy arasyndaǵy odaqtyq qarym-qatynastar týraly shartqa túbegeıli qaıshy keledi dep sanaımyz...», delingen jaýap notada.
