Jobalardy basqarýdyń jańa tásilderin úıretýdi maqsat etip otyrǵanyn aıtqan «Qazaqstan-2050» jalpyulttyq qozǵalysy keńesiniń múshesi Ǵanı Nyǵmetov joba maqsatyna toqtaldy.
– Jastarǵa jeke kóshbasshylyq quzyrettiligi men daǵdysyn úıretý, áleýmettik kásipkerlikti tıimdi júrgizý búginde óte mańyzdy. Prezıdent jarııalaǵan baǵdarlamalyq maqalada aıtylǵan mindetterdi iske asyrýǵa bilim berý arqyly úles qosa alamyz. Qozǵalysymyzǵa múshe azamattardyń qatary jyl saıyn artyp keledi. Bilim berý men oqytý – rýhanı jańǵyrý baǵdarlamasyn iske asyrýdyń eń tıimdi tásili. Osy jaıtty eskere otyryp, ár sala boıynsha jaqsy trenerlerdi jınap, 12 taqyryp boıynsha semınar ótkizemiz, - deıdi ol.
Onyń aıtýynsha, jobaǵa 25-35 jas aralyǵyndaǵy kez-kelgen el azamattary qatysa alady. Olarǵa joǵary biliminiń bolýy, jumys tájirıbesiniń eki jyldan kem bolmaýy jáne aǵylshyn til deńgeıi sııaqty birneshe talap qoıylyp otyr. 29 qyrkúıekke deıin motıvasııalyq hat joldaý arqyly irikteý týryna qatysý kerek.
Oqytý nátıjesinde qatysýshylarǵa teorııalyq bilim berýmen ǵana shektelmeı, naqty áreketke baǵyttalǵan ınteraktıvti ádistemeler qoldanylmaq. Ǵylym men praktıka negizinde tanymal spıkerler básekege qabiletti kadrlardy daıarlaýdyń sapasyn arttyrý jáne kásibı mindetterin derbes ári shyǵarmashylyq turǵydan sheshýge, kásibı qyzmettiń tulǵalyq, jáne qoǵamdyq mańyzyn túsiný boıynsha dáris oqıtyn bolady. Bul rette «Geneva Business School» AQ basshysynyń orynbasary Aıjan Túsipbekova oqytý úderisin oqýshylardyń ómirlik tájirıbesine negizdelgen tulǵaaralyq qarym-qatynas negizinde júzege asyrýdyń mańyzy zor ekenin aıtty.
– GenevaBusinessSchool-dyń 6 elde ókildiligi bar. Oqytý barysynda oqýshylar bir-birimen tájirıbe bólise otyryp, óz betinshe jańa bilim men daǵdylardy úırenedi. Úzdik qatysýshylarǵa arnap birneshe granttyq baǵdarlamalar usynyp otyrmyz, – degen ol básekege qabilettilikti jetildirý úshin qosymsha múmkindikter beriletindigin jetkizdi.
Trenıng 2-17 qazan aralyǵynda ótedi. Barlyq qatysýshylarǵa «Zhangyru» korporatıvtik oqytý» kýrsynan ótkeni týraly sertıfıkattar beriledi. Al úzdik dep tanylǵan tórt qatysýshy joba seriktesi «Geneva Business School» ókildigi usynǵan MBA baǵdarlamasy boıynsha bilim berý granty men bilim alý jeńildikterine ıe bolady. Búgingi oqý naryǵynda talap etiletin kásibı quzyret pen menedjmenttiń túrli salasy boıynsha biliktilikti arttyrýǵa múmkindik beretin biregeı jobanyń bas seriktesi – «Samuryq-Qazyna Trust» áleýmettik jobalardy damytý qory. Trenıngterdiń onlaıyn kórsetilimin «Qazaqstan-2050» jalpyulttyq qozǵalysynyń saıty arqyly da kórýge bolady.
Aıa О́mirtaı,
«Egemen Qazaqstan»
