Jeńil atletıka • 22 Qyrkúıek, 2017

Jeńil atletterimiz jarady

457 ret

kórsetildi

3 mın

oqý úshin

Ashǵabadta ótip jatqan jabyq ǵımarattaǵy jáne jaýyngerlik óner boıynsha V Azııa oıyndary bel ortasyna keldi. Jarystyń besinshi jáne altynshy kúni Qazaqstan quramasynyń qorjyny tórt altyn, alty kúmis jáne jeti qola medalmen tolyqty. Ásirese jeńil atletterimiz jarady. Olardyń enshisinde úsh altyn, bir kúmis jáne eki qola júlde bar.

Egemen Qazaqstan

Grıgorıı Egorov jattyqtyratyn jeńil atletıka quramasy eki kúnde 10 medal jeńip aldy. Onyń altaýy – altyn. О́tken jarys kúni Sergeı Grıgorev (syryqpen sekirý), Olga Rypakova (uzyndyqqa sekirý) jáne Ivan Ivanov (ıadro serpý) V Azııa oıyndarynyń altyn júldesin ıelengen bolatyn.

Jarystyń besinshi kúninde Olga Rypakova (úsh qarǵyp sekirý), Vıktorııa Zıabkına (60 metrge júgirý), Elına Mıhına (400 metrge júgirý) top jardy. Marııa Ovchınnıkova (úsh qarǵyp sekirý) kúmisti ıelense, Olga Safronova (60 metrge júgirý) men Mıhaıl Lıtvın (400 metrge júgirý) úzdik úshtiktiń qatarynan kórindi. Al áıelder arasynda 4h400 metrlik estafetadan Qazaqstan qyzdar quramasy chempıon atanǵan bolatyn. Alaıda uıymdastyrýshylar altyn júldemizdi qaıtaryp aldy. Sebebi jarys kezinde Anastasııa Vınogrodova syzyqty basyp ketip, quramamyzdy jarystan shettetti. Sóıtip, altyn Taıland quramasyna buıyrdy.

Jalpy, Qazaqstannan Ashǵabadqa 14 jeńil atlet attanǵan bolatyn. Onyń toǵyzy júldege qol jetkizdi. Jeńil atletıka boıynsha, qazaqstandyq atletter medal sany boıynsha jalpy esepte top jardy.

Sonymen qatar belbeý kúresinen úsh balýanymyz alty medal ıelendi. Aıdos Qulmanbetov (82 kg) V Azııa oıyndarynyń chempıony atansa, 90 kılo salmaqta beldesken Ersultan Muzapparov bir kúmis jáne bir qola medaldy qanaǵat tutty. Sondaı-aq Perızat Jaqypbekova (70 kg) klassıkalyq jarysta qarsylasyna ese jiberip, kúmis júldeni mise tutsa, erkin dástúr boıynsha kúmiske qol jetkizdi. Al Bekbol Nurlanuly (100 kg) qola júldeger atandy.

Al bılıard sportynan Ernar Shymbaev pen mýaıtaı ókili Elaman Saıasatov V Azııa oıyndarynyń kúmis júldesin ıelendi. Qurama qorjynyna qola medaldy djıý-djıtsýdan Galına Dývanova, mýaıtaı sportynan Erqanat Ospan (60 kg) men Namık Neftalıev (71 kg) saldy.

Jabyq ǵımarattaǵy jáne jaýyngerlik óner boıynsha V Azııa oıyndarynyń altynshy kúniniń qorytyndysy boıynsha, Qazaqstan quramasy jalpykomandalyq esepte 31 medalmen (7, 9, 15) besinshi orynǵa turaqtady. Ázirshe, Túrikmenstan quramasynyń sportshylary aldyna jan salar emes. Keshegi kúnniń kestesindegi nátıje boıynsha, olardyń qorjynynda 130 medal bar (55 altyn, 38 kúmis jáne 37 qola). Iran Islam Respýblıkasynyń sportshylary 43 júldemen (11, 8, 24) ekinshi orynda tur. Al úshinshi satyǵa taban tiregen Taıland quramasynyń qorjynynda 33 medal bar (10, 11, 12).

Álı BITО́RE,
«Egemen Qazaqstan»