Osy arada basyn ashyp aıtatyn taǵy bir jaǵymdy jaıt osy konkýrstardyń jeńimpazdary ózgeler emes, múmkindigi shekteýli jandardyń ózderi bolyp shyqqandary. Buǵan tań qalýǵa bolmaıdy. О́ıtkeni ashy men tushyny tatqan biler, alys pen jaqyndy jortqan biler degendeı, múgedek jandardyń jaı-kúıi men múmkindikterin olardyń ózderinen artyq sirá, eshkim bile qoımaıtyn shyǵar. Múmkindigi shekteýlilerge arnalǵan jobalarda «qolarbaǵa baılanǵandardyń» alǵa qara úzip shyǵýynyń basty syryn osyndaı tabıǵı zańdylyqtan izdeýimiz kerek sekildi.
Máselege osyndaı kózqaras turǵysynan kelgende bıyl Aqtóbe oblysynda ótkizilgen «Úzdik áleýmettik jobalar» konkýrsynda jigerli jan, rýhy bıik azamat Shahan Joldasbaevtyń jeńiske jetýi kezdeısoqtyq emes dep batyl túrde aıta alamyz. Basty mamandyǵy tehnık-ınjener bolyp tabylatyn ol «Pandýs-OK» atty arnaıy mamandandyrylǵan kásiporynǵa jetekshilik jasaıdy. Qazirgi kúni Shahan Shahmaranuly Astanada ótip jatqan «Qazaqstanda jasalǵan úzdik áleýmettik jobalar» atty respýblıkalyq kórmeniń bel ortasynda júr.
Oıy ozyq, túısigi tereń zerdeli azamat joǵaryda atalǵan arnaıy qurylys kásipornyn 2014 jyly qurypty. «Mundaǵy maqsatym – áleýmettik-turmystyq ǵımarattarǵa jáne onyń aýmaǵyna turǵyndardyń az jumyldyrylǵan toptarynyń emin-erkin kirip-shyǵýyna ońtaıly jaǵdaılar týǵyzý edi. Qazirgi kúni o basta oılastyrǵan jobalaryma tolyqtaı qol jetkizdim dep aıta almaımyn. Degenmen arada ótken úsh jyl ishinde biraz istiń basy qaıyrylyp qalǵanyn kóńilime medeý tutamyn. Osy aralyqta bizdiń jobamyz boıynsha jasalǵan arnaıy pandýstarmen 20 nysan qamtyldy», dedi Shahan baýyrymyz rızashylyq keıipte.
Shoqtyǵy bıik kórinetin Shahanmen ekeý-ara áńgimede taǵy bir kóńilge túıgen jaıt, sonymen birge ol pandýstar ornatý reti men orny bolmaǵan áleýmettik-turmystyq oryndarda elektr qýatymen jumys isteıtin, beınelep aıtqanda, lıftiniń ornyn aıyrbastaı alatyn arnaıy kótergish tetikti ornata alǵandyǵy. Onyń sany pandýstarmen salystyra qaraǵanda áldeqaıda asyp túsedi. Shahan Joldasbaev budan úsh jyl buryn óz kásipornyn ashqan kezge deıin «О́z kózimmen qaraǵandaǵy qala» atty jobamen shuǵyldanyp kelipti. Aıtar oıymyzdy budan da góri ashyńqyrap aıtqanda munyń ózi qolarbaǵa tańylǵan múgedektiń oı-maqsattary bolyp shyǵady.
Ári bul jeke bastyń qamyn kúıttegen is emes, tutastaı respýblıka qalalary jaǵdaılarynda múmkindigi shekteýli jandardyń sol qalalarda ómir súrip, turmys keshýge beıimdele bilý múmkindigin aldyn-ala qamdaǵan kemel is bolyp shyǵady. Sonyń ishinde Shahan ózimen taǵdyrlas jandar Aqtóbe qalasyndaǵy belsendi azamattyq ómirge qanshalyqty beıimdele alatyny jóninde bólek tolǵamdar jasaıdy. Bul derektiń ózi Shahan Joldasbaevtyń arnaıy mamandandyrylǵan qurylys kásipornyn qurý jónindegi qadamǵa qurǵaq, jalań entýzıazmmen emes, arnaıy kásibı ázirlikpen kelgenin kórsetedi. Onyń aıtýyna qaraǵanda, qazirgi kúni «Pandýs-OK»-ge qurylysy júrip jatqan nysandardan kóptegen suranystar túsip jatqan kórinedi. Onyń tizbegi tek turǵyn úılermen shektelmeıtinin de Shahan Joldasbaev jetekshilik jasaıtyn kásiporynǵa degen senimniń belgisi dep baǵalaǵanymyz jón shyǵar. Joǵaryda aıtylyp ótkendeı, bizdiń keıipkerimizdiń basty maqsaty múgedekterge arnalǵan ıkemdi de yńǵaıly pandýstar problemasyn túbegeıli sheshý bolyp otyr. Osy oraıda taǵy bir aıta keterlik másele qazirgi tańda «Pandýs-OK»-nyń qyzmetine suranystar tek respýblıkamyzdyń batys óńirinen ǵana túsip kelse, aldaǵy jyldary onyń aýqymy tutastaı elimizge taralady dep kútilýde. Dál osylaı bolaryna kásiporyn basshysynyń senimi óte nyq kórindi. Osy arada Shahan Joldasbaev ónegeli otbasy ıesi ári eki balanyń ákesi ekenin aıta ketken jón. Onyń «sal aýrýyna ushyraǵan azamattardy qoldaý jónindegi qoǵamdyq birlestiktiń» belsendi múshesi ekeni de bólek bir áńgimeniń enshisi. Sondaı-aq rýhy joǵary jan, paralımpıalyq júzý sporty boıynsha respýblıka chempıony, jyl adamy, «Jan shýaǵy» qoǵamdyq syılyǵynyń bas ıegeri.
Temir QUSAIYN,
«Egemen Qazaqstan»
AQTО́BE
